Accessibility links

сишәмбе, 6 декабрь 2016, Казан вакыты 19:14

28 noyäbrdä Qazanda federal' mönäsäbätlär, regionnarnıñ üseşenä bağışlanğan konferensiä açılaçaq


28 noyäbrdä Qazanda federal' mönäsäbätlär, regionnarnıñ üseşenä bağışlanğan konferensiä açılaçaq

Şuşı könnärdä başqalabızda tağın ber ğäyät zur ähämiätle temağa bağışlanğan fänni konferensiä açılaçaq. 28-29 noyäbrlärdä «Qazan» milli-mädäni üzägendä «Federal' mönäsäbätlär, regionnar üseşe häm federal' okruglar» digän cıyılış eşliäçäk. Anı Qazan federalizm institutı häm İdelbuyı federal' okrugınıñ strategik tikşerenülär üzäge ütkärä. Konferensiädä federativ mönäsäbätlär, regionlaştıru protsessları, alarnıñ etnomädäni häm etnosäyäsi aspektları, federalizmnıñ kiläçäge, Rusiädä töbäklärneñ üseşe, gubernalaştıru, töbäklärneñ suverenitetı, üzbilgelänü häm üzidärä temaları tikşereläçäk. Şulay uq bu cıyılışta xäzerge Rusiädä Tatarstannıñ urını, respublikada ilne guberniälärgä bülügä mönäsäbät kebek mäsälälär dä çittä qalmas, dip kötelä. Älege fänni konferensiädä qatnaşuçılarnıñ isemlege dä şaqtıy ğına sallı. Anda Tatarstan, Mäskäw, Tübän Novgorod, Samar, İjaw ğalimnäre qatnaşaçaq.

Şulay uq 28 noyäbr könne «Sozidanie» xäräkäte dä çirattağı tügäräk östäl cıyılışın ütkäräçäk. Bu yulı konferensiä korrupsiä problemasına bağışlanaçaq. Anda korrupsiä belän köräşneñ ısulları, aña qarşı çaralar kürü, bu eştä xakimiät organnarı, cämğiät, matbuğatnıñ role häm alarnıñ xezmättäşlege turında fiker alışu bulaçaq. Älege tügäräk östälneñ eşendä törle mäğlümät çaraları, xakimiät wäkilläre, şulay uq ictimağıy häm säyäsi oyışmalar wäkilläre dä qatnaşaçaq.
XS
SM
MD
LG