Accessibility links

чәршәмбе, 7 декабрь 2016, Казан вакыты 15:33

Tatarstanda latinğa küçerlärme?


Tatarstanda latinğa küçerlärme?

Ä inde Rusiädä qullanışta barı tik kirillitsanı ğına qaldıruğa qarata sessiä kön tärtibenä kertelgän mäs’älä urınlımı? Rusiä xakimiäte bu mäs’älädä Tatarstan pozitsiäsen iskä alırlıq häm çigenerlek urın qaldırdımı? Deputat Räzil Wäliev fikere.

Monda ber ömet qaldı — Rusiä prezidentı Vladimir Putin bu qanunğa qul quymas digän. Çigenerlek tä urın qaldırıldı. Ägär dä berär xalıq kirilldan başqa törle grafikada yazırğa teli ikän, alar Rusiä Däwlät Dumasına möräcäğät itep, anıñ maxsus qararı belän üzläreneñ tellären başqa grafikağa küçerä alalar. Läkin Rusiädä ruslardan qala başqa xalıqlarğa mönäsäbätne iskä alıp, moña ömet bik az, dip uylıym min. Şuña kürä, ägär dä Vladimir Putin bu qanunğa qul quya ikän, bez Rusiäneñ Konstitutsion mäxkämäsenä möräcäğät itä alabız. Çönki bu qanun ilneñ töp qanunına qarşı kilä. İnde Konstitutsion mäxkämädä dä ciñep çığa almıybız ikän, bez hiçşiksez xalıqara mäxkämägä möräcäğät itärgä tieşbez.

Sessiäneñ berençe säğätlärendä ük tağın ber çetrekle urın, tağın ber qarşılıq üzen sizderde. İnde küptän mäğlümät çaraları milek, aqça bülü mäsälälärendä Qazan şähäre xakimiäte häm Ministrlar kabinetı arasında qarşı toru bar dip täqrarlıylar. Moña räsmi dälillär dä kiterälär. Äytik, respublika konstitutsion mäxkämäseneñ 15 üktäbr qararı. Mäğlüm ki, älege qararda, qısqa ğına itep äytkändä, Ministrlar kabinetı rayonnarnıñ häm respublika ähämiätendäge şähärlärneñ, şul isäptän Qazan şähäreneñ dä, cirlegenä kergän däwlät milke belän idärä itüe xoquqı raslandı. Sessiädä şuşı qarşılıq Tatarstanda milekçelärgä satıluçı däwlät milkendäge häm munitsipal' milektäge binalar, tözelmälär häm qorılmalar urnaşqan cir kişärlekläreneñ xaqın açıqlaw öçen cir bäyäsen bilgeläw turında qanun proyektın ikençe uqılışta qabul itkändä mäğlüm buldı. Ber deputat, ğömümän, munitsipal' milek digän äyber yuq ul, dide. Qazan şähär administratsiäse başlığı Kamil İsxakov süz alıp, munitsipal' milek bar, ul Tatarstan konstitutsiäsendä qaralğan, dip belderde. Soñraq, älege qanunğa kertelgän tözätmälär öçen tawış birgändä, bu mäs’älädä deputatlarnıñ ikegä bülengäne açıqlandı. Tawış birgändä 30-lap deputat qarşı tawış birde. Qayber irekle mäğlümät çaraları, äytik «Звезда Поволжья» gazetı, büdjet proektın tikşergändä dä Qazan şähäre xakimiäteneñ häm xökümätneñ qapma-qarşı pozitsiälärdä bulaçağın farazlıy.
XS
SM
MD
LG