Accessibility links

җомга, 2 декабрь 2016, Казан вакыты 23:00

Xacğa baru bıyıl küpmegä töşäçäk?


Xacğa baru bıyıl küpmegä töşäçäk?

Bügenge yañalıqlarıbıznıñ axırında — dini xäbärlär. Bu atnadan Tatarstan möselman uqu yortlarında uqular başlanıp kitte. Uqular anda Ramazan ayı säbäple tuqtatılğan ide. Şul uq waqıtta şäkertlär respublikanıñ törle mäçetlärendä praktika da üttelär. Düşämbedän Tatarstandağı 8 möselman uqu yortında — İslam universitetı, 2 yuğarı häm 5 urta mädräsälärendä yañadan uqularğa kereştelär. Sişämbe könne Xalıqlar duslığı yortında din ähelläre, dini oyışmalar wäkilläre häm tabiblar cıyıldı. Älege cıyılışta süz din häm meditsina yärdämendä keşelärne sawıqtıru ısulları turında bardı.

Ä Tatarstan Diniä näzäräteneñ «İdel-Xac» programması wäkilläre şuşı könnärdä Xac säfärenä äzerlek başlanuı turında iğlan itelär. Şulay itep, Xac qılırğa teläkläre häm mömkinlekläre bulğan tatarstanlılar Qazan şähäreneñ Lobaçevskiy uramı, 6 yortta urnaşqan Tatarstan Diniä näzärätenä möräcäğät itä alalar. Dokumentlarnı qabul itü 2002 yılnıñ 23 dekaberenä qädär däwam itäçäk. Şulay uq bu xaqta Diniä näzäräteneñ küptän tügel genä açılğan İnternet säxifäsendä dä beleşep bula. Anıñ adresı — www.e-islam.ru. Xac säfäre här möselman öçen sawaplı ğämäl. Läkin şul uq waqıtta ul bik awır häm cawaplı eş tä. Anı oyıştıru da ğayät zur häm mäşäqätle. Bıyıl ul niçek oyıştırıla? Xacğa baru nindi bäyägä töşäçäk? Şuşı xaqta tulıraq mäğlümät alu öçen bez Diniä näzärätenä möräcäğät itärgä buldıq. Näzärätneñ «İdel-Xac» programması direktorı Färida xanım Ğataullina «Azatlıq» radiosı tıñlawçılarına bu xaqta menä närsälär söyläde.

AUDİO: Xacğa barırğa telägän keşelärgä kiräkle dokumentlar: çit il pasportı, fotografiälär, difteriä häm meningittan yasalğan privivkalar, tabiblardan sälämätlek torışı turında spravkalar. Xac säfären oyıştıra Diniä näzäräteneñ «İdel-Xac» programması wäkilläre. Bıyıl böten xacilarnı şuşı bülek aşa cibärergä digän qarar qılındı, çönki elekke yıllarda turistik firmalar aşa kitkän qayber xacilärneñ kire qaytmaw yäisä yıraq säfärdä törle qıyınlıqlarğa oçraw oçraqlı bik yış bula ide. Xacğa baru oçqıçta oçuçılar öçen 54600 sum, avtobusta baruçılar öçen 34600 sumnı täşkil itä.

İnde äytkänebezçä, Xac säfären oyıştıru ciñel närsä tuğel. Bıltır Xac qıluçılarnıñ berniçä kön buyı oçqıç kötep Kiprda yatuları äle dä küplärneñ isendäder. Bıyıl da şuşındıy xäl qabatlanmasmı, digän sorawğa Färidä Ğataullina bolay dip cawap birde.

AUDİO Bıltır bez äle berençe yıl ğına eşli idek. Bıyıl inde bezneñ täcribä zurıraq, şuña kürä andıy qıyınlıqlar kilep çıqmas, dip torabız. Xäzer bez elekkege kebek Mäskäw firmaları aşa eşlämibez. Xättä oçqıçlar da üzebezneke. Qızğanıçqa qarşı, Tatarstan oçqıçları anda oçmıylar. Şuña kürä bez Üzbäkstan avialiniälär belän kileştek. Läkin Xac säfäre bik awır säfär, anda barısı da bezdän genä tormıy. Läkin bez barısı da äybät bulır, dip ömetlänäbez.

Xac säfärenä äzerlek turında sez Tatarstan Diniä näzäräteneñ «İdel-Xac» programması direktorı Färida xanım Ğataullinanı tıñladığız.

Gölnaz İlgizär.
XS
SM
MD
LG