Accessibility links

Кайнар хәбәр

Qazanda Basket-xoll açıldı


Şimbä könne Qazannıñ näq üzägendä, Qaban külenän yıraq bulmağan ber urında mähabät ber sport sarayı açıldı. Äle yañaraq qına monda iske, cimerek yortlar sütelä ide. Yaña Basket-xoll dip atalğan saraynıñ zur zalına 7500 tamaşaçı sıyaçaq. Monda gimnastika, voleybol, qul tubı, futbol, sport biyüläre, köräş yarışları ütäçäk. Sport sarayınıñ bäyäse yartı milliard sumğa yaqın. Bu Basket-xollnı Törkiäneñ “Odak” firması tözi. Xäzergä şuşı Basket-xollnıñ keçkenä zalı açıldı. Qazannıñ Uniks komandası Rusiä basketbol sportında zur uñışlarğa ireşkän ide. Bu zalda uyınnarnı 1300 tamaşaçı qarayaçaq. Ägär dä cäy köne şundıy zamança, irken bina äzer bulsa, möğäyen, Bötendönya tatar kongressına kilergä telägän keşelärneñ küp öleşe uramda qalmas ide. Xäzergä xokkey uyınıy torğan sport sarayınnan ğayre mondıy zatlı binalar bulmadı. Tizdän Bolaq buyında Piramida açılaçaq. “Tatar cırı-2002” festivaleneñ final konsertları da ğıynwar başında Piramidada ütärgä tieş. Anda da küñel açu, buş waqıtnı faydalı ütkärü öçen, yäşlärne mawıqtırırlıq mömkinleklär äybät bula dilär.
XS
SM
MD
LG