Accessibility links

пәнҗешәмбе, 8 декабрь 2016, Казан вакыты 19:15

Putin Qıtayga yasagan ike könlek säfären tämamlap Hindstanga kitte


Russie citäkçese Putin Qıtayga yasagan ike könlek säfären tämamlap Hindstanga kitte.. Putin belän Jiang Qıtaynıñ separatist möselmannarga häm Russieneñ Çeçen separatistlarına qarşı alıp bargan suğışta berbersen yaqlarğa väğdä itte. W.Putin sişämbedä Peking universitetında yasagan çığışında üzeneñ könbatış yaqlı säyäsäten aqlarğa tırıştı.

SSSRnıñ cimerelüennän soñ Mäskäü belän Peking öleşçä global xakimiät AQŞqa qarşı kontrbalans buldıru öçen üz aralarında duslarça mönäsäbät buldırırğa tırıştı. Qıtay da Russie dä 11nce sintäberdän soñ Waşingtonğa kübräk yaqınlaşqan bulsalar da oçraşuda här ike citäkçe dä äytersen lä bu yöklämälären berbersenä raslarga tırıştı.13 bitlek deklaratsiedä yaña säyäsät bilgelägän ber närsä dä yuq, ämma Korea yarım utraundagı bilgesez vazğiätkä nıq basım yasala.

Russie dä Qıtay da Dönyanıñ yazmışı häm tönyaq könçığış Aziedä iminlek urnaştıru öçen yarım utırauda atomtöş häm küpläp üterü qorallarınıñ bulmavı şart digän qaraştalar. Här ike il AQŞ belän Tönyaq Korea arasındağı mönäsbätlärneñ normalläşüe häm ireşelgän kileşülärneñ köçtä qalırğa tieşlegeneñ ähämiätenä basım yasıy. W.Putin ütkän ayda Kommunistlar partiäse qorıltayında citäkçelektä bulğan üzgäreştän soñ QItayga kilgän in möhim çit il qunagı. Ul partiäneñ yaña citäkçese Hu Jintao belän dä oçraştı. Peking dä , Mäskäü dä G:Bushnıñ terrorğa qarşı suğışına qatnaşa… Alar amerikan xärbiläreneñ Üzäk Aziegä kilep urnaşularına endäşmi toralar, alar şulayuq telämiçä genä BMOnıñ Ğıyraqnı qoralsızlandıru turındagı rezolutsiesen yaqlap çıqtı häm AQŞnıñ Ğıyraqqa yasauı mömkin höcümne bik borçılıp kötälär…

Jiang da Putin dä Ğıyraq mäsäläsen tınıç yulllar belän xäl qılırğa çaqırıp , qayber illärneñ keşe xoquqları mäsäläsendä ike törle ülçäü qullanuına şiqäyät belderde häm keşe xoquqların xalıqara mönäsbätlärdä basım çarası itep qullanıluın kire qaqtı. İke citäkçe dä İslamçı terrorğa qarşı berberse belän xezmättäşlek itärgä wäğdä itte. Jiang , Putinnıñ çeçen baş kütärüçelärenä qarşı aksielären xuplap çıqtı. Putin Üzäk Azie häm Xinjiang töbägendä islamçı törkemnärgä qarşı xezmättäşlek itärgä wäğdä itte. Wladimir Putin sişämbedä Peking Universitetında studentlarğa üzeneñ könbatış yaqlı säyäsäten aqlap , AQŞ belän konfrontatsie faydalı näticälärgä alıp barmas ide dide.

AQŞnıñ dönya mäsälälärendä östenlek itüenä qarşı kilgän Qıtay belän Russie strategik partnärlıq buldırırğa tırışsalar da, Mäskäü sonğı waqıtlarda kübräk könbatış yaqlı säyäsät alıp bara,. xätta NATO belän dä xezmättäşlek itä başladı. Ämma Peking dä bu eştä qalışmıy dip äytergä kiräk, Jiang ta Buşnıñ Texastagı utarında qunaq bulıp kitte, xättä Tönyaq Atlantik Berektäşlegeneñ 53 yıllıq tarixında Peking berençe märtäbä anıñ belän strategik dialog urnaştıru telägen belderde.

Ämma ul alliansqa quşılğan Baltıyq illärennän qurqınıç kürmäven äytkän. Russie citäkçese iminlekkä qurqınıç xalıqara terror, küpläp üterü qoralları , politik vä dini extremizmnan kilä dip tagı ber märtäbä studentlar aldında qabatladı . Mäskäü dä Peking dä Buşnıñ terrorğa qarşı suğışın yaqlap , üzläreneñ terrorçılar dip qarağan möselman separatistlarına qarşı suğışta yaqlau tabunı ömed itä…

Russie citäkçese belän Qıtay prezidendı berbersene cılı süzlär komplimentler äytep ayrılıştı……Daimi ütkärelgän summitlar Mäskäüneñ könbatışqa bigräk tä AQŞqa yaqınlaşuına qarata borçılğan Pekingnı tınıçlandıru çarası bulıp tora. Färidä Xämit, Praga
XS
SM
MD
LG