Accessibility links

Кайнар хәбәр

Ğiraq üzeneñ qoralları turındağı xisabın BMOğa waqıtınnan alda tapşırırğa äzerlänä


Berläşkän Millätlär Oyışmasınıñ qoral inspektorları bügen Ğiraq başqalasındağı prezident sarayında buldı. 8 saraynıñ 3se-Bağdadta, häm näq şunda küpläp üterü qoralı saqlanuı turında farazlar bar. Tikşerüçelär ike törkemgä bülenep binağa ike yaqtan kergän dip xäbär itelä. Jurnalistlarğa alar belän uzarğa röxsät itelmägän. Bügengä tikşerülär tämamlanğaç, inspektorlarnıñ matbuğat wäkile Hiro Ueki,tikşerüçelär biredäge här binanı kontrol itte. Ğiraqtan 1998nçe yılda kitkän tikşerüçelär qaldırğan qayber cihazlar başqa urınnnarğa küçerelgän, qayeberläre watılğan, dide.

Ğiraqnıñ Däwlät Kontrol İdaräse başlığı Hussam Mohammäd Amin, Ğiraq, qorallar turındağı xisabın şimbä, Berläşkän Millätlär Oyışması bilgelägän waqıttan ber kön alda tapşıraçaq, dip belderde. Amin, Ğiraqta küpläp üterü qoralı yuq, dide.

Amerika Quşma Ştatlar Saqlanu ministrı urınbasarı Paul Wolfowitz, Ğiraq belän suğışnı buldırmau mömkin, dip belderde. Läkin, BBC kanalına birgän äñgämäsendä, Wolfowitz, Säddäm Xösäin monıñ öçen tırışlıq kürsätergä tieş, dip belderde.

Mäskäwdä, tışqı eşlär ministrı Yuri Fedotov, İTAR-Tass mäğlümat agentlığına, Berläşkän Millätlär Oyışması qoral inspektorlarınıñ Ğiraqta üz eşlären başlaularına ömet bağlawın belderde. Älege añlatmalar, Amerikan prezidentı George Bushnıñ Ğiraq citäkçese Säddämğa cibärgän tağın ber belderüdän soñ yasaldı. Bush isä, Ğiraqtan kilgän işarälär älegä ömetle tügel, dip belderde.

Amerikan saqlanu ministrı urınbasarı Paul Wolfowitz isä bügen Törkiägä kilde. Maqsatı- Ğiraqqa xärbi çaralar iğlan itelä qalsa räsmi Änkara belän xezmättäşlek urnaştıru, Törkiäneñ xärbi bazaların qullanırğa röxsät alu. Änkara, Ğiraqqa qarşı suğış başlansa, kördlär bülenep çığıp bäysezlek öçen suğış başlar digän borçılu belderä. İlneñ könyaqkönçığışında Törkiä politsiäse inde 15 yıl körd ğısyançılarına qarşı köräş alıp bara
XS
SM
MD
LG