Accessibility links

шимбә, 3 декабрь 2016, Казан вакыты 20:53

Berläşkän Millätlär Oyışmasınıñ qoral inspektorlarınıñ Ğiraqqa kilülärenä ber atna waqıt uzdı


Berläşkän Millätlär Oyışmasınıñ qoral inspektorları bügen Bağdadnıñ könyağındağı Al-Tuwaithi häm başqalanıñ tönyaqkönbatışında urnaşqan Al-Muthanna şirkätlärendä buldı. Al Muthanna’da 90nçı yıllarda ximik qoral citeşterelgän buluı xäbär itelde. Tikşerülärneñ ikençe atnası başlandı. Oyışmanıñ general sekretare Kofi Annan, Ğiraqnıñ inspektorlar belän xezmättäşlegen “yaxşı” dip bäyäläp bula, dide. Amerika Quşma Ştatları däwlät sekretare Colin Powell da, qoral inspektorlarnıñ Ğiraqta eş başlauları uñışlı buldı, digän fiker belderde. Läkin ike kön elek Amerikan prezidentı George Bush, Ğiraqnıñ xezmättäşlege ällä ni ömetle tügel dip beldergän ide.

Bügen Ğiraqnıñ tönyağındağı oçışlar tıyılğan zonanı kontrol itkän Amerikan häm Britan oçqıçlarına ut açıldı. Alar üz çiratında Ğiraqnıñ hawa höcümnärennän saqlanu cihazların utqa tottı. Bäysez mäğlümat çaraları bu xäbärne äle raslıy almadı.

Törkiä, Ğiraqqa qarşı xärbi çaralar başlana qalsa, üzeneñ xärbi bazaların qullanırğa röxsäten birde, läkin aña qadär, Quşma Ştatlarnıñ suğış başlau niäten xuplağan Berläşkän Millätlär Oyışmasınıñ yaña rezolyutsiäsese qabul itelergä tieş. Bu-räsmi Änkara quyğan şart.

Amerika Quşma Ştatları saqlanu ministrı urınbasarı Paul Wolfowitznıñ Törkiägä säfäre bügen dä däwam itte. Bügen Änkarada yasağan belderüendä “ike il arasında, xärbi plannar tözü häm äzerlek çaraları başlau turında kileşü tözelde”, dide.Amerikan prezidentı George Bush, Törkiäneñ saylaularda ciñep çıqqan Aq Partiä yulbaşçısı Recep Tayyip Erdoğannı Waşingtonğa çaqırğan. Söyläşülär, Törkiä-Amerika xezmättäşlegenä bağışlanaçaq, dide Wolfowitz.

XS
SM
MD
LG