Accessibility links

пәнҗешәмбе, 8 декабрь 2016, Казан вакыты 07:17

Waşington Ğiraqnıñ qoral programmaları xisabında problemalar bar dip belderde


Düşämbe könne Quşma Ştatlar Ğiraqnıñ tıyılğan qorallar turındağı xisabına üz bäyäsen bu atna axırında iğlan itäçägen belderde. AQŞ däwlät sekretare Kolin Pawell xisapta qayber problemalar bar disä dä alarnıñ nidän ğibarät buluın äytmäde. Waşington Bağdatqa 12 meñ bitlek bu xisaptağı citeşsezleklärne xatalarnı tözätü öçen ikençe mömkinlek birelmiäçäk dip kisätä.

Älegä AQŞ Ğiraqnıñ qoral programmaları turındağı xisabına räsmi bäyälämäsen beldermäsä dä atna başında Däwlät sekretare Colin Powell bu xisapta qayber problemalar tabıluın iğlan itte.

AUDİO: Bez başta uq bu xisapqa şik belän qarawıbıznı äytep quyğan idek. Häm miña kilgän mäğlümätkä qarağanda bu şik nigezle bulıp çıqqan. Ul xisapta problemalar bar.

Powell ul probemalarnı atap äytmäsä dä, AQŞ häm Britaniä wäkilläre elegräk 12 meñ bitlek bu xisapta zur ğına buşlıqlar buluı turında beldergän ide.

Aq Yort wäkile Ari Fleischer minemçä BMO niätlärennän, monıñ belän Ğiraqqa üze citeştergän küpläp üterü qoralları turında tögäl häm tulı mäğlümät tapşıru öçen soñğı mömkinlek birelüe citärlek däräcädä açıq kürenä ide dide. Ämma çığışlarda bu problemalarnıñ nidän buluı turında älegä berni dä äytelmi.

Däwlät Sekretare Powell tizdän Waşintonnıñ xisapqa räsmi bäyälämäse iğlan iteläçägen belderde.

AUDİO: Bez üzebez tapqan problemalarnı BMO qoral tikşerüçeläre Xalıqara atom energetikası agentlığı belän urtaqlaşabız. Häm bez BMO İminlek Şurasınıñ daimi äğzaları belän xäbärläşep torabız. Ämma bez täğäyen bäyälämäne yäki täğäyen belderüne barı tik analizlawlarnı tämamlağannan soñ ğına iğlan itäçäkbez.

Powell äytüenä qarağanda, Waşingtonnıñ bäyälämäsen bu atna axırında kötärgä kiräk. Pänceşämbe könne isä Ğiraqtağı qoral tikşerüçelär citäkçese Hans Bliks BMO İminlek şurası aldında çığış yasiaçaq. BMO resolütsiäse qoral tikşerüçelärgä ğalimnär häm atom, biologik ximik qoral programmalarına qatnaşı bulğan başqa keşelär belän oçraşıp soraw alu mömkinlege birüne taläp itä. Pawell, ägär dä Ğiraq rezolütsineñ şuşı öleşen ütämäsä xalıqara cämäğätçelek ciılıp tieşle çaralar kürü turında qarar çığaraçaq dide.

Buş administratsiäse xisaptağı buşlıqlar BMO rezolütsiälären tupas bozu bularaq dip bäyälänäçägen beldersä dä, monıñ nigezendä xärbi höcüm başlaw belän yanawdan tıyılıp qaldı.

Londondağı Patşa kolledjınıñ saqlanu mäs’älälären öyränüçe tikşerenü üzäge citäkçese Paul Cornish AQŞ häm Britaniä räsmilären bigräk tä bu xisapnıñ ximik häm biologik qorallar turındağı öleşe borçıy.

Agentlıqlar äytüençä älegä räsmilär xisaptağı buşlıqlar turında ğäyre räsmi, mikrofonsız söyläşülärdä genä äytä. Daily Telegrath AQŞ küzläw xezmäte belgeçläreneñ xisapta 1998-nçe yılda tikşerüçelär kitkändä qalğan meñnärçä tonna ximik häm biologik matdälär turında, şul isäptän gorçitsa gazı tutırılğan 550 miçkä turında berni dä äytelmi digän süzlären bastırıp çığardı. Şul uq gazeta Xisapta ni öçen Ğiraqnıñ Afrikada Uran satıp alırğa telägänlege, häm niçek itep bayıtılğan uran äzerläwgä yaraqlı kamil texnologiälär satıp alırğa ciınğanda totıluı turında berni dä äytelmi dip yaza.

Naif Aqmal, Praga
XS
SM
MD
LG