Accessibility links

сишәмбе, 6 декабрь 2016, Казан вакыты 15:22

20 dekaberdä Qazanda «Piramida» mädäni üzäge açıla


Axırda mädäni yañalıqlar. Tizdän Qazanda küptän kötelgän ber waqiğa bulaçaq. Başqalabızda bik zur qızıqsınu uyatqan, serle ber tözeleş inde tämamlandı, disäñ dä bula. «Piramida» dip atalğan mädäni üzäk 16 dekaber könne qullanışqa tapşırıldı. Comğa, 20 dekaber könne, nixayät «Piramida» räsmi räweştä açılaçaq. Älege çarağa inde äzerlek tämamlanıp kilä, märtäbäle qunaqlar çaqırılğan, tantana da äzer diärlek. Piramida üzägeneñ açılışına Boris Yel''sin da çaqırılğan. Xäyer, mädäni üzäk inde üzeneñ räsmi açılışına qädär ük zur qunaqlarnı kürde. Mäsälän, Rusiäneñ mädäniät ministrı Mixail Şvıdkoy da monda bulıp, yaña küñel açu üzäge belän tanıştı. İsegezgä töşerep ütik, «Piramida» 7 yıl elek tözelä başlağan ide. Şuşı waqıttan birle älege tözeleş turında törle imeş-mimeşlär küp buldı. Monda närsä tözelä, anda närsälär urnaşa, tözeleşkä küpme aqça kitkän — şuşı häm başqa küpsanlı sorawlar borçıdı qazanlılarnı. Nixayät, şaqtıy ğına sorawlarğa cawaplar buldı. Älege mädäni üzäktä konsert zalı, sport belän şöğıllänü öçen klublar, maturlıq üzäge, restoran urnaşqan. Piramida bik zamança, matur itep bizälgän. Ul Rusiädä unikal'' qorılma, dip sanala ikän. Şulay itep, Qazanda tağın ber küñel açu üzäge barlıqqa kilde. 28 dekaber könne şuşı küñel açu üzägendä Tatarstanda yıl axırında ütä torğan traditsion «Sport yoldızları balı» uzaçaq. Bäyrämgä Rusiäneñ sport eşläre buyınça komitet räise Vyaçeslav Fetisov häm tanılğan tennis trenerı Şamil Tarpişçev ta kilergä tieşlär. Bu bäyrämdä respublikanıñ sport yoldızların xörmätliäçäklär. Ä menä ğıynwar başında, inde xäbär itkänebezçä, şul ul «Piramida» üzägendä Qazan cır söyuçeläre arasında bik populyar bulğan «Tatar cırı» festivale ütäçäk.

Ä 20 dekaberdän Qazan räsmi räweştä Yaña yıl bäyrämnäre çorına kerä. Pänceşämbedän başqalabızda barlıq yelkalar bizälep betep, üzläreneñ utların yandıraçaq. Şähär dä şuşı köngä qädär maturayıp, bäyrämgä äzerlänep betergä tieş.

Gölnaz İlgizär, Qazan

XS
SM
MD
LG