Accessibility links

Кайнар хәбәр

Yamal-Nenets avtonomiäle okrugınıñ Nadım şähäre tatarları yardäm sorap millättäşlärgä möräcäğät itä


Kötmägändä Yamal-Nenets avtonomiäle okrugındağı Nadım şähärennän xat kilep töşte. Anı bezgä Älfiä Wağizova yazğan. Bu şähär belän moña qadär bäyläneşebez yuq ide, häm dini cämiğät eşçänlegennän qala milli tormışqa artıq iğtibar yuq, dip uylıy idek. Qısqası, Älfiä xanım yazğan 8 bitlek xatnıñ qayber öleşlären Azatlıq tıñlauçıları iğtibarına da citkeräsem kilä.

Sezgä möräcäğät itüçelär-qardäşläregez, millättäşläregez. Uç töbedäy qomlıqta qalqıp çıqqan, oçqıç-boralaqlar belän dä tiz genä barıp cirä almaslıq yalan tundrağa urnaşqan tözüçelär, gaz tabuçılar, torba saluçılar ile ul-Nadım qalası. Şähärebezdä 7 meñnän artıq tatar-başqort xalqı yäşi. 96nçı yılda Wäsiät oyışması tözelgän ide. Alar dini yolalarnı başqaralar, dini bäyrämnärne ütkärälär. 2000nçe yılda tırışa torğaç, tatar-başqort xalqın berläştergän Duslıq klubı açtıq. Ximayäçelär yardäme belän törle yal kiçäläre ütkärdek. Tuğan illärdän alıp kilgän video kassetalarnı qarap milli kiemnär tektek. Nadımda öç tapqır kontsert birdek. Aq Qalfaq eşçänlege başlanğanğa yıldan arttı. Üzebezneñ qartlıqnı, onıqlarıbıznıñ kiläçägen uylap pensiägä çıqqaç tuğan illärebezgä qaytırbız, onıqlarıbız üz millätebez arasında .zlären çit keşelär itep xis itmäsen dip bıyıl balalar icatı üzägendä Tamırlar klubı açtıq. Aña 5 yäştän 13 yäşkä qadär sabıylar, üsmerlär yöri. Başqort telen Räüzilä Fänil qızı, tatar telen Zäliä Förid qızı alıp bara.

Ğınwar ayınnan üzäkkä Sabıyğa, Mäğrifät, Mäğärif, Başqortstan qızı häm başqa jurnallar da kiler dip tüzemsezlek belän kötäbez. İke yıl Duslıq üz qazanında qaynadı. Xäzer bezgä alğa taba barırğa, üsergä, üzebez artınnan balalar klubın äydärgä kiräk. Bäyrämnärne niçek matur eçtälekle itep ütkärü turında, ğöref-ğadätlär turında da qullanmalarıbız yuq. Balalar öçen vokal däresläre açarğa dip totınsaq-belgeç bar, ber nota häm cır kitabıbız yuq ikän. Biü däreslären Cır häm Biü ansamble kassetasınnan qarap öyrätergä tırışabız. Balalarğa milli kiemnär tegü öçen tuımalar da aldıq, ämmä qalfaq, külmäk, kamzul ölgeläre taba almıybız. Qazan-Tömän-Mäskäw täcribäsen öyränäse, millättäşlär belän bäyläneşkä keräse kilä. Ximayäçelär tabıp uqıtuçılarnı da belem üsterü kurslarına cibärer idek. Täcribäle millättäşlär, klublar, milli mädäniät üzäkläre bezneñ belän bäyläneşkä kerä alsa-mäñge räxmätle bulır idek, dip yazğan Nadım şähärennän Älfiä Wağizova. Ömetlär belän adresın da kürsätkän. Надым-5. До востребования. Альфии Швавлиевне Вагизовой.

Nail Alan, Tömän
XS
SM
MD
LG