Accessibility links

пәнҗешәмбе, 8 декабрь 2016, Казан вакыты 15:02

"Washington Post": Rusiä möselmannarı höcümnärgä duçar bula


Rusiä citäkçeläre süzdä, islamnıñ terrorğa bäyle buluwın kire qaqsa da, ildäge möselmannar soñğı aralarda, torğan sayın yışraq törle ezärlekläwlärgä duçar bula. Häm bu xätta xakimiat wäkilläre tarafınnan da eşlänä. Bu xaqta inde xäzer, möselmannarnıñ üz basmaları ğına tügel, Könbatıştağı mäğlümat çaraları da yaza. Düşämbedä Washington Post basması, Rusiä möselmannarı höcümnär maqsatına äylänä digän mäqälä bastırdı.

Üz mäqäläsen Washington Post Rusiä başqalası yanında urnaşqan Zvenigorod şähäre möselmannarnıñ tormışın sürätläwdän başlıy. Mäskäwdäge teatrnı yawlap alu waqiğäsenıñ qaytawazı, Zvenigorodnıñ 500-läp möselmanı namaz uqırğa yörgän, yağılmağan, tözelep tä betmägän mäçetendä köçle buldı dip yaza Susan Glasser. Üktäbrdäge totıq aludan soñ uq mäçetneñ imamı Yaqub Wäliullinne Federal’ iminlek xezmäte FSB bülekçäsenä çaqırıp, añardan, mäxällädäge möselmannarı xaqında soraşalar. Alar, sez, möselmannar, keşelärne üteräsez dip äyttelär, alar ğomumän bar möselmannı da terrorçılar belän bäyli di Wäliullin. Rusiädä islamofobiä dip atalğan şuşı küreneş, san yağınnan qarağanda, ildäge iñ qüwätle azçılıqnı teträtte, möselmannar Rusiädä, pravoslavlardan qala, iñ zur dini törkem bulıp tora häm alarnıñ biredä ğasırlarğa suzılğan tarixı bar. 70 yıl däwamında däwlät tarafınnan allasızlıq säyäsäte alıp barılğannan soñ Rusiädä xäzer, mäçetlär tözüdä, ata-babalar ğädätenä qaytuda çağılğan möselman yañarışı bara, läkin Zvenigorod möselmannarı, häm Rusiädäge 20 millionlap islam dinen totuçılarnıñ zur öleşe öçen şuşı yañarış belän bergä iminsezlek tä kilde. Çeçnä suğışına, 11-nçe sintäbr waqiğälärenä, häm Mäskäwdäge teatrda totıq itep aluğa işarä yasap, Rusiä başqalasında urnaşqan Şäreq institutı professorı Robert Landa, şuşı täräqqiat, urıs cämğiatendäge, inde elektän ük islamğa doşman bulğan häm anı terror täğlimatı itep kenä kürgän köçlärne tağın da nığıttı ğına dip belderä. Zvenigorodtağı mäçet imamı Yaqub Wäliullin üz çiratında, xäzer möselmannarğa biredä yäşäw bik awır di. Anıñ fikerençä, Rusiädä ber problema bar, anda haman da doşman ezlilär. Elek bu yähüdlär bula ide, läkin xäzer alar barısı da İzrailgä kitep bette. Şuña da säyäsätçelär, xakimiate bulmağan biçara möselmannarnı kürep aldı, yähüdlär urınına alar xäzer möselmannarğa höcüm itä, xalıqnı qotırta. Bez yaña yähüdlär dip belderä imam Wäliullin. Rusiädäge islamofobiä törle räweştä çağıla dip däwam itä Washington Post, häm bu uñaydan, bıltır skinheadlarnıñ Mäskäw bazarında oyıştırğan tar-mar itülären iskä ala. Gazetada şulay uq, Orenburdağı tatar jurnalistı Färit Noğmanov tarixı da kiterelä. Andağı tatar awılında, cirle xakimiatneñ möselman ziratı östendä urıs çirkäwe salu qararın tänqitläp mäqälä bastırğannan soñ FSB anıñ wahabilarğa bäyle buluwın tikşerä başlıy, näticädä ul 16 yıl eşlägän cirennän kitärgä mäcbür qala häm östäwenä aña şul wahabi iseme tağıla. Bezneñ yaqlarda şulay inde, di Noğmanov, ägär dä sin xakimiatne yaqlamıysıñ ikän, şunda uq wahabigä äylänäseñ. Washington Postta dönya kürgän, häm Rusiädäge möselmannar xälenä bağışlanğan şuşı mäqälädä şaqtıy urın, andağı möftilärneñ ber-bere belän kileşep eşli almıy, üzara tartqalaşıp yatuwına birelä. Bu uñaydan gazeta Mäskäw möftie Rawil xäzrät Ğäynetdinneñ, möselmannarnı bülgäläw däwlät mänfäğätlärenä turı kilä, xökümättä möselmannarnıñ berläşüwen telämägän keşelär bar, alar öçen bülgäläp xakim itü caylıraq digän süzlären kiterä, häm şul uq mäqäläsendä Washington Post, Rusiä möselmannarı arasında üzara doşmanlıqnı qızdırıp toru öçen elekke sovet çorı alımnarı qullanıla dip yaza.
XS
SM
MD
LG