Accessibility links

Кайнар хәбәр

Ğiraq Quşma Ştatlarnı häm Britaniäne yalğan taratuda ğäyeli


Ğiraqta küpläp üterü qoralları ezläw däwam itkändä Bağdad Britaniägä häm Quşma Ştatlarğa qarşı açıq möräcäğätlär suğışı başlap cibärde. Tıyılğan qorallarnıñ buluın kire qağuçı Ğiraq qoral tikşerülärdä AQŞ üzäk küzläw idaräsen dä qatnaşırğa çaqırdı, häm bu däwlätlärne yalğan taratuda ğäyepläde. Qoral tikşerülärgä bäyle soñğı waqıyğalar belän sezne Naif Aqmal tanıştırıp kitä

Yäkşämbe könne Ğiraq Prezidentı Säddam Xösäyen häm Ğiraq räsmiläre Bağdad BMO qoral tikşerüçeläre belän xezmättäşlek itü öçen mömkin bulğannıñ barısın da eşli häm qoral ezläwlärdä Üzäk Küzläw İdaräseneñ qatnaşuına da äzer dip belderde. Säddamnıñ töp kiñäşçelärennän berse Ämir äs-Saadi Bağdadta jurnalistlarğa, uzğan 4 atnadağı qoral tikşerülär, AQŞ häm Britaniäneñ Ğiraq küpläp üterü qoralları citeşterä digän ğäyepläwläreneñ yalğan häm nigezsez buluın kürsätte dide. Ul Bağdadnıñ qoral programmaları turındağı xisabında qayber närsälär töşerep qaldırılğan digän belderülärne kire qağıp, 4 yıl elek eşlägän qoral tikşerüçelärne Ğiraqta nerv gazı bar dip kürsätü öçen yalğan dälillär qullanuda ğäyepläde.

AUDİO: Bu könnärdä Ğiraqqa qarşı uynaluçı älege qotoçqıç uyında Amerikannar häm Britannar ğına qatnaşa. Alar BMO qoral tikşerüçelären, xalıqara atom energetikası agentlığın häm dönyanı Ğiraqnıñ küpläp üterü qoralların yäşerüen raslawçı ışanıçlı dälillärgä iä bulularına inandıra aldı.

“Xätta CİA şikle urınnarnı kürsätü öçen qoral tikşerüçelär yanına berär keşesen cibärsä dä ber qarşılığıbız yuq,” - dide Saadi. Waşington CİA keşelären cibärü täqdimen kire qaqtı häm xäzer döreslekne raslaw yöklämäse Quşma Ştatlarda tügel, kiresençä Ğiraq häm Prezident Säddam Xösäyen dönyağa küpläp üterü qoralları citeştermäwlären kürsätergä tieş dide.

Prezident Säddam Xäzer dönya cämäğätçelege Amerikağa monnan arı Ğiraqnıñ irekle xezmättäşlege öçen agressiä häm çikläwlär zarurlığı bulmawın äytergä tieş dide. Düşämbe könne xakimiättäge Baath partiäseneñ räsmi basması bulğan ät-Thawra gazetı berençe bitendä Buşnı Ğiraqqa qarşı suğışnı aqlaw öçen yalğan qullanuda ğäyepläde. Gazeta “keçe Buş xakimiäte cämäğätçelek iğtibarın çınbarlıqtan çitkä yünältü häm Ğiraqqa qarşı agressiä öçen säbäp ezläw maqsatında yalğanğa häm ğäyepläwlärgä nigezlängän qotırğan kampaniä başlıy” dip yazıp çıqtı.

Bügen qoral tikşerüçelärneñ biologik qoral ezläwçe törkeme elek balalar öçen söt citeşterelgän, xäzer yabılğan, Bağdadtan 25 çaqrım könbatıştağı ber urınnı barıp qaradı. Ximik qoral ezläwçelär bağdadtan 10 çaqrımda urnaşqan terlek vaksinaları şirkäten häm xärbi industriäläşterü komissiäse qaramağındağı tağın ber urınnı tikşerde.

Aq Yort wäkile Reuter agentlığına “bez Ğiraqnı BMO aşa qoralsızlandıru niätennän çigenmi genä, Säddam Xösäyenne qoralsızlanırğa mäcbür itüneñ soñğı öleşenä kerep barabız dide.

Ul Arada Ğiraq tiräsendä suğışqa äzerlek çaraları däwam itä. Bağdat höcüm bulğan oçraqta Ğiraqtağı möhim qorılmalarnı saqlaw öçen tere qalqan bulırğa teläwçelärne Ğiraqqa kilergä çaqıra başladı. İzrail’ suğış bulğan oçraqta Ğiraqnıñ üç alu höcümnärennän saqlanu öçen äzerlek künegüläre ütkärä häm raketa höcümennän salqanu sistemaların yaxşırta. Waşington Farsı qultığı tiräsendä Ğinwar-Fevral’ aylarında 100 meñlek ğäskär tuplarğa niätli. Belgeçlär äytüençä suğış bula qalsa anı Mart, Aprel’ aylarına qaldırırğa yaramiaçaq, çönki ul waqıtta Ğiraq çüllärendä cäyge çellä başlanaçaq.

Ğiraqqa bäyle möhim kiläse möhim qararlarnı isä Ğinwarnıñ 27-sennän soñ kütärgä kiräk. Ul köndä qoral tikşerüçeläre BMO İminlek Şurasında xisap biräçäk. Naif Aqmal, Praga
XS
SM
MD
LG