Accessibility links

сишәмбе, 6 декабрь 2016, Казан вакыты 05:50

Boris Yeltsin “Piramida” açıp, Mäskäwgä qaytıp kitte


Şimbä könne Boris Yeltsin Naina xanımnı häm säfärdäşlären “Rossiä” dip atalğan oçqıçqa utırtıp Mäskäwgä qaytıp kitte. 6 kön däwamında ul Tatarstan belän tanıştı. Ul küptänge dustı Mintimer Şäymiev belän berniçä tapqır oçraşıp, serläşep utırırğa küptän telägän bulğan. Yeltsinnıñ Qazanğa kilüe, keçkenä waqıtta äti-änise belän torğan yortta yäşäwçe Suxovlarnıñ qäberenä Yeltsinnıñ xäläl cefete Naina İosıf qızınıñ tere çäçkälär iltep saluı häm başqa waqiğalar turında täfsilleräk söylärgä cayı çığar. Ä xäzergä comğa kiçendä Rusiä häm Tatarstannıñ berençe prezidentları Boris Yeltsin häm Mintimer Şäymievneñ üzäk univermag qarşında häm Kreml' diwarları tiräsendä tözelgän yaña “Piramida“ açıluı turında äytäse kilä.

Ozaq yıllar buyı tözelgän bu serle bina çınnan da cämäğätçelekne şaqqatırdı. Qayberäwlärneñ äytüenä qarağanda, mondıy texnik qorılma häm küñel açu binası siräk oçrıy ikän. Amerikanıñ Las-Vegas şähärendä şuña oxşaş Piramidanı kürüçelär bar. Proyektnı Tatarstan cirlegendä icat itüçe Vasiliy häm Gölsinä Tokarevlar ğailäse, anı ğämälgä quyuçı TAIF kompaniäse, tözeleşne alıp barğan bilgele törek firması häm başqalar keşe ışanmaslıq zur eş başqarğannar. Piramida qarşında feyerverklar atılğannan, utlı çuqmar, yäğni fakel, totqan saqçılar yanınnan ütep işektäge qızıl tasmanı kiskännän soñ, zamança tamaşa zalınıñ säxnäsenä Tatarstan prezidentı Mintimer Şäymiev çıqtı. Ul bu binanıñ tözeleşen respublikanıñ bügenge zur qazanışı bularaq bäyäläde:

Tatarstanda Rusiäydä berençe märtäbä menä şundıy soqlanırlıq piramida tözelde. Ägär inde bezneñ xalqıbız, bezneñ respublikabız Piramida tözü xälenä citkän ikän, bu inde bik küp närsä turında söyli. Minemçä, bu Piramidada bezneñ xalıqnıñ böten köçe, energiäse, anıñ eçtälege, omtılışı. Älege Piramida ğasırlarğa bezneñ närsägä sälätlege ikänlegebezne kürsätä torğan simvol bulsın!

Boris Yeltsin “Piramida”nıñ texnik proyektın da, tözelü sıyfatın da yuğarı bäyäläp, Tatarstannıñ döres häm qüätle xäräkät itüen bilgeläde. Boris Yeltsin menä şuşı tantanalı mizgeldä TAIF kompaniäse citäkçese Albert Şihabetdinov äytkänçä, iñ tıynaq häm iñ buldıqlı şäxes Radik Şäymievkä maxsus büläk tapşırdı. Rusiäneñ häm Yevropanıñ iñ köçle avtomobil' sportçılarınıñ berse, xalıqara sport masterı Radik Şäymiev älege piramida tözü ideyäsen uylap çığarğan häm anı ğämälgä quyar öçen bik küp köç salğan ikän.

Annarı yaña yal häm küñel açu qorğanında İlham Şakirov, Salawat, Albert Asadullin cırladılar. Mäskäwdän häm Peterburgtan kilgän estrada yoldızları çığış yasadılar. Qunaqlar bu yulı tamaşaçılar urındığında ğına tügel, ä sıy-xörmätle öställär artında utırdılar. Küñel açu bik qızıp kitkäç, tözüçelär, TAIF häm “Piramida“ dusları, şähär, rayon, ministrlıq citäkçeläre säxnä qarşındağı mäydançıqta biep tä küñel açtılar. “Piramida”nıñ nindi ikänlegen belergä teläwçelär İnternetta www.pyramida.ru säxifäsen açıp, anıñ nindi ikänlegen häm bäyälärneñ küpmelegen belä ala. Ägär dä inde İnternetqa çığarlıq mömkinlekläregez, kompyuterığız yuq ikän, dimäk “Piramida”ğa barıp yal itü ixtıäcığız da, mömkinlegegez dä ällä ni köçle tügelder.

XS
SM
MD
LG