Amurdağı Komsomolski şähäre tatarları yardäm sorap Tatarstannıñ Norlat şähäre citäkçelegenä xat yulladı

Küptän tügel genä Yamal-Nenets Avtonomiäle okrugındağı Nadım şähäre tatarlarınıñ milli ictimaği tormışnı canlandırıp cibärüdä yardäm sorap dönya tatar cämäğätçelegenä möräcäğät itüläre turında söylägän idek, xörmätle tıñlauçılar. Nadım tatarlarına xas problema Yıraq Könçığıştağı Amurdağı Komsomolski şähäre tatarların da borçıy. Läkin bu yäş milli üzäk yardäm soraunıñ başqa ısulın uylap tapqan. Amurdağı millättäşlärebez möräcäğätlären turıdan turı Tatarstannıñ Norlat şähärenä, şähär häm rayon citäkçelärenä yullağan. Xäzer alar cawap kötä. Yıraq Könçığıştağı tağın qayber başqa xäbärlärgä kilgändä, Magadan ölkäse 3 fevral könne gubernator saylauların uzdıruğa äzerlänä. Töbäkneñ yä ber yä ikençe şähärendä qarşılıq çaraları bara. Uzğan atnada Petropavlovsk Kamçatskiğa Saxalinnıñ kommunal xezmät eşçännäre quşılğan ide.

İra Tacieva, Xabarovski