Accessibility links

шимбә, 3 декабрь 2016, Казан вакыты 22:56

Däwlät Şurası utırışında 2003 yılğa Tatarstan büdjetı qabul itelde...


Sişämbe könne Tatarstan Däwlät Şurasınıñ XIII plenar sessiäse eşen däwam itte. İrtänge yaqta deputatlar bertawıştan diärlek öçençe uqılışta 2003 yılğa Tatarstan byudjetı turında qanun proektın qabul ittelär. Büdjetnı tikşerü barışında büdjet-finans mäs’äläläre komissiäsenä barlığı 258 tözätmä kertelde. Bu tözätmälär xaqında, bigräk tä östämä çığımnar, östämä aqça taläp itkän tözätmälär xaqında ozaqqa suzılğan bäxäslär, tartqalaşlar barsa da, 80 tözätmäne deputatlar bik tiz genä qabul itep quydılar. Çönki bu tözätmälär Tatarstan prokurorı häm Däwlät Şurasınıñ xoquq idäräse täqdime belän kertelgän, anda Tatarstannıñ 2003 yılğa byudjet proektınıñ qayber nigezlämäle Rusiä Federatsiäseneñ büdjet häm salım kodekslarına turı kilmäwe turında kisätelgän. Şuña kürä bu tözätmälär belän hiç tä kileşmiçä bulmıy. Menä şundıy ozaqqa suzılğan bäxäslär häm fiker alışulardan soñ xökümät täqdim itkän 9.7% defitsitlı büdjet qabul itelde.

XS
SM
MD
LG