Accessibility links

сишәмбе, 6 декабрь 2016, Казан вакыты 19:17

Qazan Yaña Yılğa äzerlänä


Ä Qazan inde yaqınlaşıp kilgän Yaña Yıl bäyrämnärenä äzerlänä. Bäyrämnärne bezdä yaratıp häm ozaq itep ütkärergä yaratalar. Şunlıqtan alarğa äzerlek tä bik citdi bula. Bu yulı da älege ğädättän taşlama yasamadılar. Xalıq üzäkkä ütärlek salqınğa da qaramıy bazarlarda, kibetlärdä bäyräm tabınına kiräkle sıy-xörmätlärne satıp ala, büläklär äzerli. Respublikanıñ awıl häm şähärlär uramnarı bäyrämçä bizälä, çırşılar balqıy. Qazan da qalışmıy. Başqalabızda bersennän-berse matur çırşılar üzläre yanına çaqırıp tora. Qazanlılar çırşını xätta su astında da quyarğa cıyınalar ikän. Qışqı su qoyınunı yaratuçılar klubı, mäsälän, Qazan yanındağı Zäñgär kül töbendä, 15 metr tiränlektä çırşı bizäp, şunda bäyräm itäçäklär.

Törle qızıqlı çaralar da citärlek. Mäsälän, şuşı könnärdä genä Qazanda çırşı belän berrättän Yaña Yılnıñ töp simvolları bulğan Qış babaylar häm Qar qızları bäygese bulıp ütte. Şähärneñ törle rayonnarınnan kilgän distädän artıq Qış babay häm alarnıñ yardämçeläre — Qar qızları älege bäygedä cırladılar, biedelär, xalıqnıñ, bigräk tä jürinıñ küñelen açtılar, teläklär telädelär. Oyıştıruçılar süzlärenä qarağanda, şuşı bäygedä ciñüçe par 31 dikaber tönendä Kreml' yanında Yärminkä mäydanında uzaçaq Qazannıñ iñ töp bäyrämendä qatnaşaçaq ikän. Tizdän şähärdä tantanalı räweştä üzäk çırşılarnıñ açılu bäyrämnäre dä başlanıp kitärgä tieş. Ä «Qazan» milli-mädäni üzäge aldındağı mäydanda bozdan törledän-törle sınnar yasıylar. Yaña Yılda alar arasında da ciñüçelär saylanaçaq.

Tatar yäşläre dä başqalardan qalışmıy. Alar da bäyräm çaraların ütkärä başladılar. Sişämbe kiçendä Ğalimnär yortında «Şärıq» tatar yäşläre klubı, yäş ğalimnär häm aspirantlar assotsiätsiäse Yaña Yıl bäyrämen uzdırdı. Anda «Säğädät» truppasınıñ teatral'läşkän tamaşası, tatar diskotekası uzdı, Qış babay, Qar qızı, su anası, ubırlılar yardämendä törle uyınnar ütkärelde.

Gölnaz İlgizär, Qazan.

XS
SM
MD
LG