Rıştua könnäre, dönyalarnıñ tınıç wä imin buluwına öndäwlär häm şuña bağışlanğan ğibadätlär belän bilgelänsä dä, suğış ixtimalı Yaqın Könçığış ofığınnan yuğalmadı. Berläşkän Millätlärneñ Ğiraqtağı qoral küzätüçeläre üz eşen şuşı bäyräm könnärendä dä däwam itte, pänceşämbedä alarnıñ berse Bagdadtağı Texnologiä Universitetı mödire Mazen Möxämmädne kürep söyläşte, törle şikle qorılmalarnı tikşerü belän bergä xalıqara inspektorlar xäzer, Ğiraqnıñ qayber ğalimnäre häm texnik belgeçlärne dä soraştıra, bu asılda Washington taläbe belän eşlänä, ul şulay itep, Saddamnıñ tıyılğan qorallar citeşterüwen kürsätkän dälillär tabarğa teli. Älegä qädär inspektorlarnıñ 27-nçe noyäbrdä başlanğan tikşerü eşläre andıy dälillär tabuğa kitermäde. Quşma Ştatlar ğomumän, qoral citeşterügä qatnaşı buluda şiklänelgän ğalimnärne, alarğa Saddam xökümäte yağınnan basımnı buldırmas öçen Ğiraqtan çittä, öçençe ber ildä soraştırunı alğa sörä, xätta alarnı şahid bularaq yaqlaw programmasın qabul itärgä dä äzer tora. Ämma älegä inspektorlar soraştırunı Ğiraq räsmi wäkilläre qatnaşında ütkärä. Ul arada Ğiraqnıñ säwdä ministrı Möxämmäd Mähdi Salix, Amerikanıñ üz ilenä qarşı suğış başlaw ixtimalı artu säbäple, xalıqqa satıla torğan azıq-tölek miqdarın arttıru turında qarar qabul itelde dip belderde. Şulay itep alarğa, ul-bu bula qalğan oçraqqa küpmeder külämdä aşamlıqlar tuplaw mömkinlege birelä. Mähdi Salix süzlärenä qarağanda, ul citäklägän ministrlıqqa, suğış çığa qalsa ildäge iqtisadi wä säwdä xällären kontrol itü wazifası yöklängän, şul maqsatta ul, keşelärneñ torğan cirlärendä kimendä 3 ayğa citärlek azıq-tölek buldıru öçen däwlättän tä’minatnı arttıru turında qarar birgän. Kiläse aylarda bu tağın da arttırılaçaq, bu ölkädä härkem üzen imin xis itärgä tieş dip belderde Ğiraqnıñ säwdä ministrı. Şuşı ildä, Sovetlar Berlegendäge tösle ük, här ğailä däwlättän azıqlarnı küpmeder miqdarda ğına ala. Bügenge köndä şuşı isemlekkä on, döge, qorı söt kebek produktlar kerä. Yıl başındaraq Bagdad, ike ayğa ber xalıqqa, ikelätä miqdar azıq-tölek birä başlağan ide. Üz ileneñ şulay itep mömkin tışqı höcümgä äzerlänüwe turında xäbär itkän säwdä ministrı, Ğiraqqa qarşı kürelgän teläsä nindi xärbi çara, doşmannıñ üzenä dä zur yuğaltular kiteräçäk, bez Watanıbıznı, üz cirebezne saqlaw öçen bar tieşle çaralarnı da kürdek, bu ber dä ciñelçä genä säyäxät qılıp qaytu bulmayaçaq dip belderde. Bagdadnıñ şuşı kisätülärenä qaramastan, suğışnıñ qotılğısızlığı turında süzlär torğan sayın arta bara, İzrailneñ xärbi küzläw citäkçese general Aharon Ze’evi Farkaş fikerençä, monı 27-nçe ğinwarğa bäylärgä kiräk, näq şul köngä, BMOnıñ Ğiraqtağı qoral inspektorları İminlek Şurasına üzläreneñ xisabın tapşırırğa tieş. İzrail premyer-ministrı Ariel Şaron da, Bagdadqa qarşı suğışnı fivral başlarına farazlarğa bula dip isäpli.
Kärim Kamal, Praga
Kärim Kamal, Praga