Accessibility links

чәршәмбе, 7 декабрь 2016, Казан вакыты 11:46

Waşingtonnıñ Tönyaq Korea säyäsäte turında


Tönyaq Korea atom qoralları öçen kiräkle plutoninı eşläp çığara alaçaq reaktornı aktivlaştıraçağı turında Xalıqara Atom Agentlığına xat cibärde. AQŞları Pxenyang qul quyğan kileşülärgä turılıqlı bulırğa, şantaz belän şägellänmäskä tieş dip belderep anıñ belän turıdan turı söyläşülär alıp barunı kire qağa. Ämma bik küplär Waşington alıp barğan säyäsät däres mikän digän soraular quya

Prezident G.W Bushnıñ turıdan turı Pxenyangdağı kommunistik rejim belän söyläşülär başlaunı kire qağuı , Waşington Korea yarım utraunda atom pokerında döres kardlar belän uynıy mikän digän soraular tudıra. Bushtan elek Clinton administratsiese Tönyaq Koreanı- xalıqara xezmättäşlek qısalarında totu öçen aña taşlamalar yasap ber ük waqıtta taläplär quya ide. Pxenyagnıñ üktäber ayında AQŞ belän 94nçe yılda ireşelgän kileşüne bozıp yäşren räveştä atom programmasına dävam itüen belderüe G.Bushnı nıq açıulandırdı. Däwlät departamentı süzçese Reeker bez şantajlarğa birelmiyäçäkbez , Tönyaq Koreanıñ qul quyğan kileşülärgä turılıqlı buluı öçen anıñ belän satulaşmayaçaq, yäki nindider büläklär birmiyäçäkbez dip belderde. Däwlät sekretarı Colin Powell, Könyaq Korea, Yaponie häm iminlek şurasınıñ daimi äğzaları belän yaqın elemtädä tora. Ul alar AQŞnıñ qatı säyäsäten yaqlasınnar dip tırışlıq alıp bara. Azie belgeçe Gordon Flake LAT gazetasına bolay dip äytkän ide: Clinton administratsiese Pxenyangnıñ ni eşliyäçägen aldan äytep bulmıy digän qaraştan çığıp xäräkät itte. Bush isä rejim ‘üz-üzen ütermiäçäk’ qädär ratsional dip qarıy .Ämma ägär dä bu döres bulmasa , näticä qotoçqıç bula ala. NYT mäqaläse prezidentnı Tönyaq Korea belän söyläşülär başlarğa çaqıra häm älbättä Pxenyangnıñ yämsez xäräkätlären büläkläü ber dä yaxşı närsä tügel,qorallarnı cäyeldermäü kileşülären bozuçı başqa rejimnar alarğa çıdamlıq kürsäteläçäk digän näticä yasamasqa tieşlär , şulay da söyläşülär başlau ber üze äle taşlama yasala digän närsäne añlatmıy dip yaza NYT . AQŞ senatorı Richard Lugar süzlärencä:Tönyaq Korea belän kilep çıqqan xällär bik qurqınıçlı , bez moña Ğıyraq qädär iqtibar itergä tieşbez. Ämma Lugar AQŞnıñ höcüm itüen kiñäş itmäs idem ,çönki Pxenyang Könyaq Koreadan üç alır Seul tiräse tämam cimereler ide dip söyläde atnakiçtä NBC programmasında. Pxenyang belän söyläşülärne qatğıy räweştä kire qağu , kileşüçänräk säyäsät yağında torğan Seulnıñ Waşington belän araların boza ala. Könyaq Koreanıñ yaña citäkçese Roh Moo Hyun , tönyaqtağı yarlı tuğannarına qarata konstruktiv säyäsät alıp barırğa wäğdä itte. Pxenyangnı bötenläy izolatsiedä qaldıru qıyın bulaçaq. Tönyaq Korea comğada Xalıqara Atom Agentlığı direktorı Möxämmäd Äl baradeiğa cibärgän xatında , agentlıq inspektorlarınıñ Tönyaq Koreada toruı öçen säbäp yuq dip belderä häm yaqın kiläçäktä laboratoriesen aktivlaştıraçağın xabär itä. BMOsı räsmiläre anda atom qorallarına yaraqlı plutoni eşläp çığaru mömkin dip belderä. Pxenyang atom programmasın aktivlaştıruına KEDO konsortiumınıñ yağulıq tapşıruın tuqtatuı säbäp buldı dip äytä. Russieneñ atom energiese ministırı Aleksander Rumyantsev krizis öçen AQŞ citäklägän konsortiumnı ğäyepläp çıqtı. Pxenyang yäşren räweştä atom programmasına dävam itüen faş itkäç, KEDO 94nçe yılğı qararnı köçtän çığardı. KEDO sivil mäqsatlar öçen qullanılaçaq reaktor tözü öçen yardäm birergä häm Tönyaq Koreaga yağulıq cibärep torırğa wäğdä itkän ide

Färidä Xämit, Praga
XS
SM
MD
LG