Accessibility links

җомга, 9 декабрь 2016, Казан вакыты 22:24

Qazan şähäre Şurası şähär büdjetı mäs’äläsen qaradı


Qazanda xäzer här könne ike meñ par kiez itek satıla ikän. Biäläy-bürek xaqında mäğlümat yuq, läkin aları da kibet kiştälärendä ozaq yatmıydır. Salqın-suıq. Kiçä dä utız ide, bügen dä utız, irtägä dä minus utız dip farazlıylar. Tik aña qarap tormış tuqtap tormıy. Uramda çatlama suıq bulsa da, pänceşämbedä «Qazan» milli mädäniäte üzägendä atmosfera qaynar ide. Biredä şähär Şurasınıñ XIV sessiäse eşläde. Anda qaralğan töp mäs'älä — 2003 yılğa Qazannıñ büdjetı turında qızu bäxäslär bardı. Küptän tügel bez «Azatlıq» radiosı aşa şähär deputatlarınıñ büdjet buyınça moñ-zarları turında işettergän idek inde. 19 dikaberdä uzğan utırışta şähär Şurası deputatları tänäfes yasap respublika büdjetın qabul itkänne kötärgä buldılar. Häm, nihayät, kötep aldılar. Tatarstan parlamentı tüşäktä yatqan Qazan büdjetına operatsiä yasamasa da, ülärgä irek birmäde. Şähär deputatlarınıñ, citäkçeläreneñ moñ-zarlarına qolaq salıp bulsa kiräk, başqalabıznıñ büdjetına ber küpme aqça östägännär, näticädä ul 4 milliard 40 million sumğa citkän.

Büdjet defitsitı 10%-tan artmayaçaq. Şuña kürä dä östämä aqça ezläw- tabu töp mäs'älä bulıp qala birä. Şähär administratsiäse başlığı Kamil İsxakov süzlärenä qarağanda, qul suzıp burıç cıyarğa turı kiläçäk. Şähär Şurası şul uq utırışta 2003 yılğa eş planın rasladı. Annarı deputatlar Tatarstan prezidentı Mintimer Şäymievkä möräcäğät qabul ittelär. Anda süz ber yıl elek Ministrlar Kabinetı tarafınnan qabul itelgän ber caysız qararnıñ zıyanı turında bara. Deputatlar fikerençä, respublika ministrlıqlarınıñ şähär oyışmaları belän turıdan-turı citäkçelek itä başlawı eşne kamilläşterergä kitermi, kiresençä, üzara tartqalaşu tudıra. Şulay itep, 6 sessiä ütkärep, 45 qarar häm 6 programma qabul itep, Qazan şähäre Şurası 2002 yılnıñ kalendaren yaptı.

XS
SM
MD
LG