Accessibility links

сишәмбе, 6 декабрь 2016, Казан вакыты 13:19

Çallıda dini konfessiälär arasında bernindi nigezle qarşılıq yuq


Bügenge xäbärlärneñ iñ ähämiätlese, möğayın, Çallıdan dip äytergä mömkin. Çallı xakime başlığı Räşit Xämädiev Qazan häm Tatarstan arxiepiskopı Anastasiy ataqay belän oçraşıp, biredäge çirkäw cimerü tarixına noqta quyğannar. Här ike yaq, yäğni çirkäw citäkçeläre häm Çallı xakimiäte bu mäsäläne çişkännär. Şähär çirkäwne başqa cirdä tözügä urın birä, anı tözi başlarğa yärdäm itä, nigezne şähär xisabına töziäçäklär, ä Ciñü parkındağı çirkäw urını şähär mäxkämäse qararı nigezendä şuşı parkta qala. Räşit Xämädiev fikerençä, Çallıda dini konfessiälär arasında bernindi nigezle qarşılıq bulmağan ikän. Şulay da, soñğı ike ayda Çallıda, Tatarstanda çirkäw cimerälär dip, böten dönyağa tawış kütärgän idelär. Ä bu şaw-şunıñ nigezendä qayber subyektiv xällär yata, bulıp çıqtı.

Räsmi xäbärlärne iskä alğanda, Mintimer Şäymievneñ Çeçen Respublika administratsiäse başlığı Äxmät Kadıyrovqa 27 dekaberdä bulğan şartlaw häm faciğa uñayınnan qayğı urtaqlaşu telegramması cibärüen äytergä kiräk. Şulay uq Mintimer Şäymiev «İnterfax» agentlığına intervyu birep, tämamlanuçı yılnıñ iqtisadi yomğaqları turında söylägän. Ul Tatarstan iqtisadınıñ sotsial' üseşkä yünälderelgän bulğanın äytkän.

XS
SM
MD
LG