Accessibility links

якшәмбе, 4 декабрь 2016, Казан вакыты 07:07

Zarema Xuciäxmätova: “Säyäsät – ul pıçraq närsä. Sabaqtaşım Rälif Safinnı naxaqqa xurlamasınnar.”


Qazanda Vladimir Putinnıñ Ural tawlarıda çañğı şuuın, Ufağa barıp, Tälğät Tacetdin qulınnan xäncär qabul itep aluın, neft'' universitetı studentları belän oçraşuın iğtibar belän küzättelär. Rusiä prezidentı Mortaza Räximovqa yartı million tatarnıñ milläten üzgärtep yazarğa röxsät birdeme-yuqmı digän sorawğa cawap tabıp bulmıy. Şuña kürä ğomumän säyäsätkä iğtibar itmäs öçen, säyäsi uyınnarnı küz kürmäsen, qolaq işetmäsen dip, Qazan uramına çığıp kittem. İñ berençe oçrağan keşe küptänge tanışım, uqıtuçı Zarema Xuciäxmätova bulıp çıqtı. Ul bik üzençälekle keşe, Qazanğa berniçä yıl elek küçep kilgäç, qayadır yuğalıp tordı. Xäzer Zarema Xuciäxmätova däwlät oyışmalarında eşläwçe çinovniklarğa tatarça däreslär birä ikän. Menä digän faydalı ğämäl bit bu. “Yaña yılğa basqaç ta, çinovniklarnıñ tatar telen öyränüe däwam itärme?”- dip soradım Zarema xanımnan Qazan byurosı studiäsenä kergäç.

AUDİO. Uqıta başladıq ministrlıqlarda. Äle uqıtıp yörgän urınım Transport häm yul xucalığı ministrlığında. Däwlät xezmätendä eşläwçelärgä tatar telen öyrätäbez. Anda inde urıslar da häm tatarça bik äybät belmägän tatarlar da bar.

Min Başqotostanda milli oyışmalarda eşlädem. Başta Ufa rayonınıñ mäğärif bülegendä eşlädem. Annan soñ Başqortostannıñ mäğärif xezmätkärläreneñ belemen kamilläşterü institutına eşkä çaqırdılar. Anı yapqaç, Başqortostannıñ “Azatlıq” tatar yäşläre berlegendä räis urınbasarı bulıp eşlädem. Başqortostanda çıdar xäl qalmağaç, min ğailäm belän Qazanğa küçep kildem. Üzem min Başqortstannıñ İleş rayonınıñ Uyandıq awılı qızı. Bez rayondaşlarıbız Robert Miñnullin, İdris Kärimullin, Musa Gäräyevlär belän ğorurlanabız. Häm yaqtaşlarım turında min cırlar da yazam.


(“Awıldaşıma” dip atalğan cır yañğırıy)

Bu cır awıldaşım Rälif Safinğa bağışlanğan. Rusiä estradasındağı yoldız Alsunıñ ätise ul. Rälif minem yäştäşem, sabaqtaşım, bez anıñ belän bergä üstek. Ul yäştän ük bik citdi ide. Ul soñğı yıllarda awılda mäçet tözette, ä minem cırım çıqtı. Awılğa asfal''t yullar saldırdı, zıyaratnı qoyma belän äyländerep aldırdı. Anı qayber Başqortostan matbuğat çaraları prezident bulırğa teli dip yazıp çıqtılar. Qayber oçraqlarda pıçratıp ta. Läkin eş anıñ prezident bulu-bulmawında tügel. Küp eşlägän keşene haman pıçratalar inde. Läkin yaxşı eşlär eşlägän saf küñelle keşelärne, minem yaqtaşlarımnı naxaqqa qıyırsıtmasınnar ide.

Billähi-wallahi, Zarema xanımnıñ İleş rayonınnan buluın, cırlar yazuın häm zamandaşı Rälif Safinnıñ qızı Alsunıñ dönya estradasında karyera yasawın zur iğtibar belän küzätep toruın, xäzer Federatsiä Sovetında utıruçı Rälif Safinnıñ yaqtaşlarına eçkersez yärdäm kürsätüen belmägän idek. Zarema Xuciäxmätova Uyandı awılında tuıp üskän häm olılarnı tatar telenä öyrätkän arada üze icat itkän şiğerlärgä cırlar yazıp, alarnı muzıkal'' yaqtan bizätep, tasmalar yazdıru belän mawığa. Säyäsättän ällä qayçan tuyğan häm awıldaşı, sabaqtaşı Rälif Safinnıñ Başqortostan prezidentlığına çığu forsatı bulu säbäple respublika matbuğatında pıçratıluına böten küñele belän qarşı. Bezgä dä, Başqortostanda kem prezident bulsa da barıber, başqortmı, urısmı, tatarmı, respublikadanmı, çittänme – eş anda tügel. Barı tik ul Rusiä häm Başqortostan zakonnarın ütäsen. Keşelärne häm millätlärne räncetmäsen. Ä qıyırsıtılğannar, üzläre dä telämästän, säyäsät belän şöğellänä başlıy.

XS
SM
MD
LG