Accessibility links

шимбә, 10 декабрь 2016, Казан вакыты 02:16

Tatarstanda Raştuanı 200 meñläp keräşen dä bäyräm itä


Tatarstanda da 7 ğinwar, Raştua köne – yal köne. İnde xäbär itkänebezçä, Tatarstan pravoslav xristiannarın Qazan häm Tatarstan arxiepiskopı Anastasiy vladıka häm prezident Mintimer Şäymiev qotladılar. Vladıka Anastasiy barlıq pravoslavlarnı xristiannarça yaqınnarın yaratırğa çaqırdı. Ä Şäymiev qotlawında, iñ möhime xäzer imannı tergezü häm anı keşe küñelenä qaytaru, dide. Raştuanı Tatarstanda pravoslav xristiannar belän bergä 200 meñnän artıq keräşennär dä bäyräm itä. Tatarstanda xäzerge köngä 7 keräşen mäxälläse bar. Qazan keräşen mäxälläsenä 1997 yılda Tixvin çirkäwe birelde. Anı Pavel ataqay citäkli. Çirkäwdä yäkşämbe mäktäbe eşli häm biredä ğibädät doğaları tärcemä itelä. Mäğlüm ki, keräşennär, mäsälän, “Отче наш”nı tatarça uqıylar. 1926 yılğa qädär xäzerge Tatarstan cirlegendä yözgä yaqın keräşen mäktäbe häm berniçä distä keräşen çirkäwe bulğan, dilär. Monı Tatarstanda yäşäwçe keräşennär uzğan yılğı xalıq sanın alu aksiäse aldınnan iskä töşerdelär. Çönki federal' üzäktän dä keräşennärne ayırım xalıq itep terkäw ideyäse kilep töşte. Tatarstan keräşennärneñ milli-mädäni berläşmäse konferensiäsendä keräşennärneñ etnos bularaq üzbilgelänüläre turında deklaratsiä qabul itelde. Keräşennär ayırım xalıq bulıp bilgelänep üzläreneñ mädäniätlärenä, mäğäriflärenä ayırım çığımnar, ayırım maddälär taläp ittelär. Xakimiät, älbättä, monıñ belän kileşmäde. Säbäpläre añlaşıla. Tatarlarnıñ tarixi watanı Tatarstanda tatarlar sanı kimüe mäs’äläneñ ber yağı bulsa, ikençe yağı – xakimiätkä östämä problemalar, nindider xakimiät strukturaları buldırırğa östämä çığımnar kiräk. Mäs'älä prezident belän oçraşu, añlaşu häm keräşennärneñ mädäni mänfäğätlären çişärgä wäğdälär belän xäl itelde. Şulay itep, Raştuağa qarşı tönne Qazannıñ İdel buyı rayonında urnaşqan Tixvin çirkäwendä dä keräşennär dä barlıq xristiannar belän bergä tönge ğibädät qıldılar, üz yolaların başqardılar.

Xäyer, real' tormışta keräşennär häm başqa şundıy milli problemalar älläni sizelmi. Moña küptän tügel premyerası uzğan, Zölfät Xäkim pyesası buyınça quyılğan, “Yawa qarlar, yawa qarlar” spektaklendä bik köçle işarä yasaldı. Älege spektakl' berniçä ay eçendä çista käğäzdän premyerağa xätle yasalğan, dilär. Şuña kürä spektakl'neñ başında uq milli problemalar, tatarnı bülgäläw, latin grafikasına küçügä qarata mönäsäbät belderelde, häm şaqtıy satiralı, xätta sarkazmlı. Töp geroylarnıñ berse elekke slesar' Şäyxulla Ğalimulloviç xäzer xalıq deputatı bulğan. İke süzneñ berendä ul “Gossovetqa barıp kiläsem bar” di, ğailä qarşılıqların xäl itüçe personajlarğa “Sezneñ problemalar problema meni? Änä, seber tatarları ayırılıp çığabız” di, “latin grafikasına küçäse bar”, di. Yäğni spektakl'dä real' tormışta ber närsä, ä räsmi dairälärdä bötenläy ikençe närsä ikänenä işarä itelä.

XS
SM
MD
LG