Accessibility links

якшәмбе, 11 декабрь 2016, Казан вакыты 03:35

Qazan Piramidasında «Tatar cırı» festivale başlanıp kitte


Çärşämbe, 8 ğinwar könne, Qazanda «Tatar cırı-2002» cır festivale başlanıp kitte. İnde xäbär itkänebezçä, ul küptän tügel genä tantanalı räweştä açılğan «Piramida» küñel açu üzägeneñ 2 meñnän artıq keşe sıydıra torğan konsert zalında ütä. 5 kön däwamında Qazan tamaşaçıların tatar estradasınıñ iñ tanılğan yoldızları üzläreneñ cırları belän söyenderäçäk. Festvial'ne oyıştıruçı «Yaña ğasır» häm «Tatarstan» telekompaniäläre, «Bars-media» şirkäte wäkilläre süzlärenä qarağanda, älege cır bäygeseneñ final konsertlarında qatnaşuçı cırçılar häm cırlar yıl däwamında tamaşaçılar fikerenä häm yazmalarnı satu näticälärenä tayanıp saylanıp alınğan. Barlığı älege konsertlarda 15 laureat isemen yawlağan başqaruçı qatnaşaçaq. Şulay itep, çärşämbe könne «Tatar cırı-2002» festivaleneñ açılu tantanası uzdı. Pänceşämbe, 9 ğinwar könne, tamaşaçılar aldında «Zöläylä» triosı, Färid Taişev, Rezeda Şäräfieva, Zöfär Bilalov, Zäynäp Färxetdinova çığış yasıyaçaq. Comğa könne alarnı Güzäl Urazova, Çulpan Mortazina, Liliä Mullağälieva, Rawil Ğäliev, Salawat Fätxetdinov alıştıraçaq. 11 ğinwarda isä İl'mir Ğäzizullin, Liliä Xämitova, Zölfiä Minhaceva, Aydar Ğälimov, Xäniä Färxi cırlıyaçaqlar. Yäkşämbe, 12 ğinwar könne, «Tatar cırı» festivaleneñ yomğaqlaw konsertı ütäçäk. Anda inde barlıq laureat-cırçılar çığış yasap, alarğa büläklär tapşıralaçaq. Şulay itep, tatar estradasın yaratsağız häm Piramida üzägenä bilet alırlıq aqçağız bulsa, «Tatar cırı-2002» festivalenä räxim itegez. Piramida digännän, Qazanda çıqqan gäcittän ber qızıqlı mäğlümätne äytep kitäse kilä. Röstäm Wafin digän ber jurnalist Yaña yıl aldınnan premyer-ministr Röstäm Miñnexanov yanında qunaqta bulğan. Bik az jurnalistlar kertelä torğan bu oçraşuda xökümät başlığın çänçep ala torğan ber soraw da yañğırağan. Xökümät kabinetında premyer belän şampan şäräben kütärgän Röstäm Wafin älege sorawğa cawapnı täfsilläp yazıp ta çıqqan. «Piramida» üzägen tözügä «Taif» firması ğına tügel, xökümät tä beraz aqça birgän ikän. Bu xäbär konkret sannar belän dälillänmäsä dä, şaqtıy ğına quyırtılıp birelgän. Qayberäwlär bu uñaydan, nigä soñ äle tiskäre faktlarnı ezläwçe jurnalistlar premyerğa qunaqqa çaqırılğan, ä däwlät säyäsäten yaqlawçı qayber matbağalarnıñ, mäsälän, «Восточный экспресс»nıñ xäbärçese älege oçraşuğa bötenläy kertelmägän, dip baş watalar. Monıñ säbäbe bik ğadi ikän. Xökümätneñ mäğlümat üzäge citäkçese Sömbel Xäyrullina bala üstergän waqıtta, anıñ urınında eşläwçe İl'dar Säğädätşin premyer tarafına üze telägän keşelärne genä çaqıra ikän. Xäzer mondıy press-sentrlar häm mäğlümat xucaları bik küp, ämma yış qına alardan citäkçelärgä fayda tügel, ä zıyan ğına kilä.

XS
SM
MD
LG