Accessibility links

чәршәмбе, 7 декабрь 2016, Казан вакыты 19:14

AQŞ Tönyaq Korea krizisın xäl qılu öçen anıñ belän söyläşülär alıp barırğa äzer bulsa da, Pxenyang taläplärenä buysınırğa cıyınmıy


Tönyaq Korea krizisı kiskennäşergä däwam itkändä Quşma Ştatları däwlät sekretarınıñ yardämçese James Kellynı Seulğa cibärde. Waşington xäzer Pxenyang belän söyläşergä äzer, xätta atom krizisı xäl qılınsa , anıñ energie citeşsezlegen xosusi investitsielär häm başqa illär yardäme belän çişep bulaçaq dip belderä.

Sonğı könnärdä Tönyaq Korea atom qoralların cäyeldermäü kileşüennän çıqtı, annan elek ul Xalıqara Atom Energiese Agentlığınıñ küzätüçelären ildän quıp çığardı häm raketa sınaularına quyğan moratoriumnı da köçtän çığara alaçağına işarä itte. Yäkşämbedä Ul böten korealılarnı AQŞqa qarşı suğışqa çaqırdı. Russie häm Yaponie räsmiläre atna azağında oçraşıp krizis turında söyläşte . Quşma Ştatları däwlät sekretarınıñ yardämçese James Kellynı Seulğa cibärde. Bu Kellyneñ üktäber ayınnan soñ töbäkkä berençe säfäre bulıp tora . Bilgele bulğança Pxenyang ul çaqta yäşren atom qoralları programması buluın iqrar itkän ide. James Kellyneñ missiäsı nıq qatmarlı , könyaqta AQŞqa qarşı xislär köçlänä bara. Yartı ğasır dävam itkän Seul -Waşington berektäşlegenä küp kenä könyaq korealılar tänqit küzlegennän qarıy başladı häm yarım utraudağı säyäsi xällärdä kübräk fiker beyan itergä tieşbez dip äytä başladı. Yäkşämbedä Seulğa kilgän Kelly könyaq Korea räsmiläre şulsanda 25nçe fevraldä vazıyfasına başlayaçaq yaña prezident Roh Moo –hyun belän küreşte. Anıñ ütkärgän mätbuğat konferensiesendä äytkän süzlärennän Waşingtonnıñ Tönyaq Korea belän söyläşergä äzer buluı, ämma atom krizisın çişü öçen Pxenyangnıñ taläplären dä qabul itmiäçäge añlaşıla. Ul Waşingtonnan berberenä höcüm itmäü kileşüe häm kübräk yardäm taläp itä… Kelly süzlärençä, älbättä bez Tönyaq Korea belän bigräk tä anıñ xalıqara cämäğätçelekkä atom qoralların yuq itüe turında biräçäk cavabın söyläşergä telibez. Häm bez monda monıñ iñ yaxşı yulı turında xökümät keşeläre belän söyläşäçäkbez. Kelly süzlärenä dävam itep tağı bolay dide : bez atom qoralları mäsäläsen xäl qılğannan soñ bälkim dä, AQŞ häm başqa ildäge xosusi investorlarnıñ Tönyaq Koreanıñ energie eşlärenä yardäm itü mömkinçelege bulır . Ämma Pxenyang Waşingtonnan işetelgän ällä ni açıq anıq bulmağan wäğdälärgä riza bulır dip kötep bulmıy. Tönyaq Korea maxsimum fayda kürü öçen basım yasıyaçaq , ul AQŞnıñ söyläşülärdän başqa ällä çaraları bulmawın bik yaxşı belä Däwlät sekretarınıñ yardämçese Kelly ,AQŞnıñ Bmondağı eleke wäkile xäzer Nyu Meksikada gubernator bulıp torğan Bill Richardsonıñ Pxenyang wäkilläre belän bulıp ütkän söyläşüläre turında ber yañalıq ta işetmädek, alar eleke belderülären qabatlıy ğına dip söyläde jurnalistlarğa. Richardson yäkşämbedä prezident Bushnı atom krizisın çişü öçen Pxenyag belän söyläşülär başlarğa çaqırdı. Ul , adminsitratsie telefon nomeren ğına cıyarğa NyuYorkta Bmosında tübän däräcädä söyläşülär başlatırğa tieş dip äytte ABC televidiniesenä birgän ängämäde. Küzätüçelär qaraşınça ,buluı ixtimal ğıyraq suğışı belän mäşğül Bush administratsiese Korea krizisınıñ tizlektä xäl qılınuı öçen bögülüçänräk pozitsie ala , ayruça Qıtay, Russie häm Könyaq Korea Pxenyang-ğa yaña ekonomik çikläülär kertügä nıq qarşı çığa. Russie tışqı eşlär ministırlığı süzçese Aleksander Yakovenko , Mäskäü Korea krizisın çişü öçen üz planıñ äzerli , plan Korea yarım utrauınıñ atom –töşsez zona buluın garantieli, humanitar häm ekonomik yardäm şulayuq iminlek garantielären birüne küzdä tota dip söyläde .

Färidä Xämit ,Praga
XS
SM
MD
LG