Accessibility links

пәнҗешәмбе, 8 декабрь 2016, Казан вакыты 15:08

İkele standartlar dönyasında yäşibez


Düşämbe könne däwlät citäkçeläre Baltaç rayonı awıl xucalığı xezmätkärlärenä zur xörmät kürsättelär. Döres, respublika mäğlümat çaralarında äytelgänçä, Mintimer Şäymiev awıl xezmätçännären Baltaç rayonına barıp büläklämäde. Baltaç rayonınıñ awıl xucalığı aldınğıları Qazan Kremlendä qabul iteldelär. Bu tantanalı çarada respublikanıñ awıl xucalığına, bigräk tä Baltaç rayonı xezmätkärlärenä bik qupşı maqtaw süzläre yañğıradı, bik küp maqtawlı büläklär-isemnär taratıldı. Awıl xucalığı, mäğlüm bulğança, uzğan yıl Tatarstan tarixında tağın ber tapqır rekordlı küläm aşlıq citeşterde. Ä Baltaç rayonı ber üze respublikanıñ biş rayonı qädär söt citeşterä ikän. Monısı räsmi mönäsäbät, räsmi taswirlau.

Döres, xätta şul maqtawlar-maqtanular arasında da awıl xucalığınıñ çın xäle işetelep kitte. Ber aldınğı maqtawlı sıyır sawuçı ayına 1500 sum xezmät xaqı alam, nişliseñ, yäşärgä kiräk, yäşibez inde, dide. Şulay awıl xalqı tırışıp eşli, rekordlı uñışlar ala häm bu şulay barısı da al da göl kebek taswirlana. Läkin ul rekordlı uñışlardan awıl xalqınıñ üzenä häm şähär xalqına ni fayda? Monısı ikençe mäsälä, monısı ikençe qaraş. Awıl xalqı söten-mayın, elekkeçä ük, mineral' su, yä bulmasa, margarin may bäxäse belän satarğa mäcbür. Rekordlı uñışnıñ da ğadi xalıq öçen töp näticäse ğädättä köz köne kibetlärdä ikmäk bäxäse kütärelü bula. Bıyıl da ikmäk bäxäse 12% çaması kütärelde. Toraq-kommunal' xucalıq reformaları digän närsä dä iñ berençe kommunal' xezmät, cılılıq, su, lift, cıyıştıru öçen tüläwlär artudan başlandı. Yaña yılğa qädär Brejnev zamanında salınğan 9 qatlı yorttağı 3 bülmäle fatirğa 500 sum çaması tüläsäñ, yaña yıldan soñ 800 sum çaması çığarıp salırğa turı kiläçäk dip farazlana. Bolay zarlanğanda ğädättä säyäsätçelär alğa kitkän çit illärdä fatirğa tüläwgä xezmät xaqınıñ yartısı kitä dilär. Ä nindi xezmät xaqı turında süz bara, monısı turında bik açılıp kitep söylämilär. Monısına ikençe törle qaraş, monısı başqa standart.

Xäyer, tayaqnıñ ikençe başı da bula, digändäy. Wäqiğälärgä, wäzğıätkä ikele standart belän kilgän jurnalistlarnıñ üzläre belän dä bik isäpläşep känfitlänep tormıylar, küräsen. Xäbär itkänebezçä, düşämbe könne Tatarstan jurnalistlar berlege Rusiä matbuğatınıñ 300 yıllığına bağışlap mäcles ütkärde. Biregä jurnalistlar saylap qına çaqırıldı. Kübese räsmi xakimiät yaqlı, däwlät dotatsiäsendäge gazeta-jurnallar baş möxärrirläre, kübräk maqtaw süzläre dä, büläkläwlär dä şular adresına yañğıradı. Läkin tağın da räsmiräk xakimiät dairäläre üzençä saylıy ikän. Tatnews.ru xäbärlärendä 17 ğinwarda İdelbuyı federal' okrug citäkçese Sergey Kirienko Rusiä prezidentı quşqança, federal' okrug mass-media wäkillärenä Rusiä matbuğatınıñ 300 yıllığı uñayınnan büläkläyäçäk dip xäbär itte. Rusiä xakimiäte Tatarstan jurnalistları arasınnan Däwlät Şurası matbuğat üzäge citäkçese Lyubov' Ağeevanı häm Tatarstandağı İTAR-TASS korrespondentı Nikolay Sorokinnı saylap alğan. Alarğa Rusiä Federatsiäseneñ atqazanğan mädäniät xezmätkäre digän isem birelgän. Ä bolay räsmi mäğlümat çaraları xäbärlärendä äytelgänçä, Tatarstan jurnalistlar berlege ütkärgän mäclestä däwlät, xökümät citäkçeläre 2003 yıl respublika mass-media çaraların reformalawnıñ xälitkeç çorı bulaçaq, dip beldergän. Ä inde älege reformalarnıñ qay yaqqa taba buluı turında, ğädättägeçä, açıq kommentariylar işetelmäde.

XS
SM
MD
LG