Accessibility links

якшәмбе, 11 декабрь 2016, Казан вакыты 10:55

Waşington Saddamnıñ waqıtı betep kilüwe xaqında belderä, qoral inspektorları isä üz eşläre öçen östämä waqıt kiräk dip isäpli


İnde mäğlüm bulğança, Berläşkän Millätlärneñ Ğiraqtağı qoral inspektorları üz eşen däwam itü öçen kübräk waqıt kiräk bulaçağın beldergän ide. Ä menä Farsı qultığında üzeneñ xärbi qüwäten könnän-kön arttırğan Quşma Ştatlar kiresençä, Saddam öçen inde waqıt çığıp kilä dip isäpli. Bu xaqta amerikan prezidentı George Bush üze dä belderde. Gärçä Berläşkän Millätlär dä, Quşma Ştatlarnıñ yaqın tarafdarları da, qoral inspeksiäläre öçen waqıt birelergä tieş dip isäpli.

Quşma Ştatlarnıñ Farsı qultığına yañadan-yaña xärbi bülekçälär cibärüwe häm Ğiraq prezidentı Saddamğa qarşı torğan sayın qırısraq belderülär yasawı sürätendä, yaña suğış ixtimalı inde xäzer qotılğısız ber närsä bularaq qabul itelä. Bu barı tik waqıt mäs’äläse genä dip isäpli küzätüçelär. Häm soñğı bäxäslär dä näq menä şul waqıt tiräsendä bara. Quşma Ştatlar prezidentı Bush Ğiraq citäkçeseneñ inspeksiälärne mömkin qädär ozaqqaraq suzıp waqıt ütkärü tırışlıqlarınnan üzeneñ inde tämam tuyuwın belderä, häm cawap totu mizgele barıber kiläçäk dip kisätä.

NC011468 Saddam Xösäyen öçen waqıt ütep bara. Ul qoralsızlanırğa tieş. Min inde törle uyınnar häm xäylälärdän tuydım, häm waqıt taläplären min şäxsän şulay küräm dip belderä amerikan prezidentı. Läkin ul älegä, üzeneñ Ğiraqqa qarşı höcümne qayçan başlarğa cıyınuwı turında berni dä äytmäde. Aq yortnıñ matbuğat wäkile Ari Fleischer bu uñaydan bolay dip belderde.

NC011505 Prezident, qoral inspektorlarınıñ üz eşen qayçanğa qädär alıp bara aluwı xaqında nindider ayırım könne küzdä totıp älegä berni dä äytmäde, läkin ul inde berniçä märtäbä, Saddam Xösäyen qoralsızlanmıy häm şuña kürä waqıt çığıp bara dip qabatladı di Quşma Ştatlar prezidentınıñ matbuğat wäkile Ari Fleischer. Berläşkän Millätlärneñ Ğiraqtağı qoral küzätüçeläre isä kiresençä, üz eşlären azağına citkerü öçen äle kimendä ber yıl kiräk bulaçağı xaqında söyli. Citmäsä, Washingtonnıñ ike möhim berektäşe, Britaniä häm Germaniä, Ğiraqqa qarşı suğışnı barı tik, Berläşkän Millätlär Oyışmasınıñ İminlek Şurası yaña qarar qabul itep, höcümgä üz fatixasın birgän oçraqta ğına yaqlayaçağın belderä. Şuranıñ soñğı qararında isä Saddamnan barı tik, yä qoralsızlanu, yä citdi näticälär aldında qaluğa äzer toru taläp itelä. Öç ay elek bu xaqta İminlek Şurasında bertawıştan kileşengän ide. Suğış öçen isä yaña qarar kiräklegen Berlindä Germaniä kanslerı Gerhard Schroeder yänä ber märtäbä qabatladı. Anıñ fikerençä, Ğiraqtağı qoral inspektorlarına üz eşen däwam itü öçen citärlek waqıt birelergä tieş, häm ul, Saddamnı qoralsızlandıru öçen yaña suğış kiräk dip uylamıy. Londonda, Britaniäneñ tışqı eşlär ministrı Jack Straw da, üz ileneñ Ğiraqqa qarşı suğışnı Berläşkän Millätlärneñ yaña fatixası belän başlaw xäyerle bulır ide digän qaraşta toruwın äytte. Läkin berük waqıtta ul Ğiraq tiräsendäge xällärneñ, İminlek Şurası yaña qarar qabul itmi genä dä täräqqi itä aluwı ixtimalın qaldırdı. Britaniä Amerika Quşma Ştatlarınıñ Ğiraq mäs’äläsendäge iñ yaqın tarafdarı, häm ägär dä Washington Saddamğa qarşı çaralar kürü qararın üze genä qabul itsä dä, London axırğı çiktä anıñ belän bergä bulaçaq digän süz.

Kärim Kamal, Praga
XS
SM
MD
LG