Bu atnada Pekiñ häm Seulda oçraşular ütkärgän Kelly bügen Tokyoda Yaponiä tışqı eşlär ministrı Yoriko Kawaguşi belän söyläşte. Kelly süzlärençä bu oçraşuda Tönyaq Korea mäs’äläse turında centekle söyläşü bulğan. Könyaq Koreadağı AQŞ ilçese Thomas Hubbard äytüençä Tönyaq Korea üzeneñ atom programmaların tuqtatqan oçraqta Waşington Pxenyan belän iqtisadıy xezmättäşlek itü mäs’äläsen qararğa äzer. AQŞ saqlanu Ministrı Donald Rumsfeld Tönyaq Koreağa qarşı köç qullanu mömkinlegen kire qarmadı. Bügen Pxenyannıñ räsmi kiñküläm mäğlümät çaraları Tönyaq Korea räsmiläreneñ bu krisiznı BMO aşa tügel, ä barı tik Quşma Ştatlar belän turıdan-turı söyläşülär aşa ğına çişep bulaçaq digän süzlären tapşırdı. AQŞ däwlät sekretarenıñ xalıqara iminlek häm qoral kontrole mäs’äläläre yardämçese John Bolton irtägä Pekiñda Qıtay räsmiläre belän oçraşıp Qıtaynıñ bu mäs’älädä yardäm itü mömkinlege turında söyläşäçäk.
