Accessibility links

Кайнар хәбәр

Ğiraq ildäge xalıqara inspektorlar belän xezmättäşlek itäme?


Uzğan atna azağında Bagdadnıñ üzendä, Berläşkän Millätlär oyışmasınıñ qoral inspektorları citäkçese Hans Blix häm Xalıqara atom energiäse idaräse başlığı Möxämmäd äl Baradeynıñ Ğiraq räsmiläre belän söyläşüläre uzdı. Alar düşämbe könne dä däwam itte, ul arada Quşma Ştatlar Bagdadtağı citäkçelekne yänä xärbi çaralar kürü ixtimalı belän kisätte.

Berläşkän Millätlär Oyışmasınıñ yuğarı wäkilläre belän uzğan soñğı söyläşülärendä Ğiraq räsmiläre alarğa, ildä tıyılğan qorallar bulu-bulmawın açıqlaw eşendä ikeyaqlı xezmättäşlekne tağın da arttırırğa wäğdä itte. Düşämbe könne ike yaq ta qabul itkän urtaq belderüdä şulay dielä. Söyläşülärdän soñ ütkärelgän matbuğat oçraşuwında BMO inspektorlarınıñ citäkçelege räsmi Bagdadnıñ xezmättäşlekkä omtıluwı xaqında şaqtıy uñay süzlär äytte, yäkşämbe häm düşämbe oçraşularınıñ bu ölkädä ni däräcädä faydalı buluwı xaqında, Xalıqara atom energiäse idaräse başlığı Möxämmäd äl Baradey bolay dip belderde.

Audio

Mindä şundıy xis qaldı ki, alar, bez citkerergä tırışqan närsälärne qabul itte kebek, häm bez yaqın könnärdä, alar yağınnan moña nindider möğämälä kürerbez digän ömet bar dip isäpli Möxämmäd äl Baradey. Soñğı atnada inspektorlarnıñ, ximik yä biologik qoral qullanu öçen yararlıq berniçä snaräd tabuwı zur borçu uyatqan ide. Alar buş bulsa da, iğtibarnı alarnıñ yaxşı xäldä saqlanuwı cälep itte. Moñardan tış Blix häm Baradey Ğiraq yağı belän söyläşülärendä, inspektorlarnıñ ber Ğiraq ğalimendä, atom qoralında qullanırlıq bayıtılğan uran turında 3 meñläp bittän torğan fänni tikşerenü qäğäzläre tabuğa da nıq borçıluwın citkerde. Läkin Bagdad şuşı tikşerenüneñ Ğiraqtağı qoral programmalarına niçek tä bulsa bäyle buluwın kire qağa. Älegä qädär ul Ğiraq ğalimnären soraştıru eşenä törleçä kirtälär quyarğa tırışa ide, bu mäs’älä soñğı söyläşülärdä dä kütärelgän bulsa kiräk, Hans Blix matbuğat oçraşuwında, bar cirlärgä dä kerü röxsäte alındı häm bu eş däwam ittereläçäk, Ğiraq yağı moñardan tış, inspektorlarnıñ xosusi urınnarğa da ütep kerüwe öçen şularnıñ xucaların moña künderü eşenä dä alına dip belderde.

Audio

Blix ta, Baradey da Ğiraq citäkçelegen, waqıtnıñ betep kilüwe, häm şuña kürä küzätü eşlären caylı ğına, kileşep däwam itü kiräklege xaqında kisätä. Häm bu Quşma Ştatlarnıñ atna azağında yänä Bagdadqa qarşı qırıs xärbi çaralar kürü yanawları sürätendä yasala. Yäkşämbedä amerikan saqlanu ministrı Donald Rumsfeld suğışnı nindi oçraqta başlaw tiräsendäge bäxäskä yaña ber östämä kertte. Anıñ süzlärençä, Ğiraqta berär şikle närsä tabılmasa da, aña qarşı suğış başlawnı Bagdadtağı citäkçelekneñ Berläşkän Millätlär inspektorları belän xezmättäşlek itmäwe genä dä aqlayaçaq.

Audio

Çın sınaw şul ğına, Ğiraqtağı rejim Berläşkän Millätlär belän xezmättäşlek itäçäkme, yuqmı. Xäzer anda barğan protses, anda berär närsä tabıp bula alunı tikşerü tügel, Anda Ğiraq rejimınıñ Berläşkän Millätlärgä kürsätkän xezmättäşlek däräcäse sınala dip belderä saqlanu ministrı Rumsfeld. Häm anıñ fikerençä, älegä Ğiraq şul sınawnı ütä almadı.

Kärim Kamal, Praga
XS
SM
MD
LG