Accessibility links

шимбә, 10 декабрь 2016, Казан вакыты 21:40

Marat Bariev: «Tatar yäşläre könnären bez cäy buyı ütkärerğä äzer»


Bügen İntettat.ru internet säxifäse sport häm yäşlär eşläre ministrı Marat Bariev belän on-line söyläşü ütkärde. Marat Bariev, internet aşa kilgän sorawlarğa cawap birep barırğa tırıştı. Küpçelek sorawlar narkomaniä, yäşlärgä häm balalarğa mäktäptän buşağan arada şöğel tabu, yäş ğailälärğä fatir aluda yärdäm kürsätü programması kebek temalar turında ide. Avstraliädäğe İrek Garif qına üz sorawların tatar telendä yazıp qaldırğan. Urıs telendäge sorawlarnıñ ber niçäse genä tatar yäşläre problemaların qağıla ide. Roman isemle internet qullanuçı, “ministrlıq ütkärgän böten çaralar urıs telendä bara, tatarlar tüläğän salımnardan cielğan büdjet aqçalarına narkomannar öçen meñläğän çaralar ütkäräsez, ä tatar yäşläre öçen bernärsädä ütkärelmi”, - digän şeltä belderä. Avstraliädä ğömer itüçe İrek Garif ministrğa 10 soraw yullıy, menä alarnıñ berniçäse: tatar yäşlärenä sotsial, mäğärif, mädäniät ölkäsendä yärdäm kürsätüçe programma barmı, sport ölkäsendä milli kadrlarnı üsterü programması yuqmı, ministrlıq çit ölkälärdä yäşäwçe tatar yäşlär belän nindi eş başqara, bötendönya tatar yäşläre qorıltayı qayçan bulaçaq, Qazannıñ 1000 yıllığın bäyräm itüdä tatar yäşlärenä nindi urın qaralğan häm başqa şundıy sorawlar.

Soñınnan bilgele bulğança, ministr äfände İrek Garif sorawlarına ayırım iğtibar birep, söyläşügä aldan äzerlänep kilgän. Bu cawaplar säxifädä soñ gına kürende. Milli mädäni üseş programması turındağı sorawğa Marat Bariev, däwlät yärdäme bülep birelgändä millätkä qaramıybız, dip äytä. Sportta da tatarğa, urısqa bülü kiräk tügel, di ministr. Sorawlar tatar telendä belem alu, diasporağa kvota birü xaqında da birelgän ide. Moña Marat Bariev, Gumanitar institut nigezendä açılaçaq milli universitetta, respublikadan çittä ğömer itüçe tatar yäşläre belem ala alaçaq, dip ıslandırdı. Ber keşe tatar yäşläre könnäre turında täqdim kertte, ministr, moña cawap yözennän, Tatar yäşläre könnären, yal lagerları kebek, böten cäy buyına alıp barırğa bez äzer, dip belderde. Tatar yäşläre kongressı turında ministr tögäl genä cawap birmäde, ütkärelgän oçraqta anı oyıştıruda Bötendönya tatar kongressı citäkçeläre qatnaşaçaq, dip wäğdä itte. Qalğan cawaplarnı İntertat.ru säxifäsendä uqıp bula.

XS
SM
MD
LG