Accessibility links

шимбә, 10 декабрь 2016, Казан вакыты 17:53

Bäyälär arta...


Toraq-kommunal' reforması Tatarstandağı mäğlümat çaralarınıñ iğtibar üzägendä qala birä. Döresräge, süz reforma turında tügel, ä şul bayraq astında bäyälärne bermä-ber kütärü xaqında bara. Olısına-keçesenä, qartına-yäşenä suğa torğan bu üzgäreşlär keşelärne çın-çınlap borçıy başladı. Törle dairälärgä şiqayätlär, telefon aşa şaltıratular işäyde. 25 ğinwarda Çeçnyadağı suğışqa qarşı uzaçaq mitingnıñ kön tärtibendä dä toraq-könküreş bäyäläre urın alğan.

Xökümät üz yağınnan fäqirlärgä subsidiälär kertü mäsäläsen tizlätergä tırışa. Läkin räximsez reforma qart-qorınıñ ğına tügel, urta yäşlärdäge urta xälle keşelärneñ dä kesälärenä nıq suğa. Citmäsä, subsidiälärne alu öçen sirat küperlären kiçärgä kiräk bula dilär.

Pänceşämbe kiçen “Efir” telekanalı aşa xökümät wäkile Alevtina Kudryavseva belän turıdan-turı elemtä oyıştırğannar ide. Süz älege dä bayağı fatir bäyäläre turında bardı. Telesüjetta qatnaşqan keşelär berawızdan üzläreneñ bäye kütärüne qabul itmäwen belderdelär. Alevtina xanım baştaraq äkiättäge Şährizadanı xäterlätep, poçmaqlarnı tügäräklärgä tırışsa da, inter-aktiv sorawlarınıñ näticäsen kürep, telen teşläde. Qänäğätsezlär sanı 170 bulğan bulsa, bäye kütärülärgä bitaraflar ber distäne dä täşkil itmägän ide.

Berär atnadan fatir xucalarına yaña bäyälär terkälgän xisap qäğäzlären kiteräçäklär. Alarnı uqıp närsä äytäçäklären küräzäçe bulmasañ da tögäl farazlarğa bula.

XS
SM
MD
LG