Accessibility links

сишәмбе, 6 декабрь 2016, Казан вакыты 13:20

Rusiä belän Germaniä Ğiraq mäsäläsenä säyäsi çişeleş ezlärgä kileşte


Rusiä prezidentı Vladimir Putin bügen telefon aşa Germaniä kanslerı Gerhard Şröder belän söyläşep, Ğiraq mäsäläsenä säyäsi çişeleş ezlärgä kileşte. Kreml süzçese äytüençä, taraflar Rusiä häm Germaniäneñ bu mäsälägä qaraşları yaqın buluın azsızıqlağan, Ğiraq problemasın Berläşkän Millätlär Oyışması qısalarında çişergä kiräklegen äytkän.

Kiçä Germaniä belän Fransiä, Ğiraqta xärbi operatsiä başlawğa qarşı çığıp, BMO isnpektorlarına kübräk waqıt birergä çaqırdı. Rusiä häm Fransiäneñ BMOnıñ İminlek Şurasında veto xoquqı bar.

Yaqın Könçığışnıñ 6 däwläte Ğiraqnı, BMO inspektorları belän xezmättäşlek itep, suğışnı buldırmıy qalırğa çaqırğan möräcäğätenä, Germaniä xuplaw belderde. Kiçä, Ğiraqnıñ 6 kürşese, Törkiä, Süriä, İordan, Söğüd Ğäräpstanı, İran häm Misır, Ğiraqnı BMOnıñ 1441-nçe rezolutsiäsen ütärgä çaqırğan urtaq belderü yasağan ide. Germaniä Tışqı eşlär ministrı Yoşka Fişer bügen İstanbulda, Törkiä Tışqı eşlär ministrı Yasar Yakiş belän oçraşqannan soñ, xäzer Ğiraq, wazğiätneñ nindi citdi ikänen añlarğa tieş, dip belderde. Fişer, Germaniäneñ Ğiraq suğışına qarşı buluın tağın ber qabatladı.

XS
SM
MD
LG