Accessibility links

шимбә, 3 декабрь 2016, Казан вакыты 05:36

Qazanda säyäsi miting ütte


25 ğinwarda, Qazannıñ Kamal teatrı binası qarşındağı mäydanda säyäsi miting ütte. Bu cıyınğa çaqıru käğäzlärendä oyıştıruçılarnıñ isemlege kiterelgän. Bötentatar İctimaği Üzäge, Xalıq frontı, “İdel-Ural” xäräkäte häm ruslar belän oyıştırılğan “Lad” ruxi bergälege. Mitingnıñ töp şiğarläre – “Bäyälär kütärüne tuqtatırğa”, “Rusiä-Çeçen suğışı açlıq-yalanğaçlıq, üleş-qırılış ul”. Bu şimbädä kön kinät kenä salqınayıp kitügä qaramastan, mitingqa 150-200 keşe kilde. Häm şaqtıy ozaq waqıt däwamında plakatlar totıp, säyäsi şiğarlär qıçqırıp toruçılar çınnan da xäzerge çorda möhim problemalar barlığın añlattılar. Qabul itelgän rezolütsiäneñ berençese – Çeçnä suğışınıñ iqtisadıy näticäläre, dip atala. Soñğı ike yıl yarım eçendä Çeçnä suğışı öçen Rusiä distälärçä million sum aqça sarıf itte. Xäzer Rusiädä 40 million keşe xäyerçelektä yäşi, keşelär açlıqtan häm salqınnan integä. Çeçnädäge suğışnı tuqtatu xisabına fatir bäyäläreneñ 3 meñ sumğa citüen tuqtatıp bulır ide, dip äytelä bu rezolütsiädä. Mitingta qatnaşuçılar Rusiä xalıqları mänfäğätennän çığıp Çeçnädäge suğışnı tuqtatunı taläp itkännär.

Şulay uq bu mitingta Ğiraqqa qarşı xärbi kampaniäne tänqitlägän rezolütsiä dä qabul itelgän. Soñğı waqıtta Tatarstanda häm Rusiädä millätara ızğış çığaru öçen islam dinenä häm keçe xalıqlarnıñ xoquqlarına qarşı ğawğa çığarıla, dip äytelä tağın ber rezolütsiädä. Milli oyışmalarğa qarşı alıp barılğan kampaniäne oyıştıruçılar ictimaği xäräkätne terrorizm häm ekstremizm dip atarğa tırışalar. Milli xäräkätlärgä qarşı ğämällär Mäskäw kürsätmäse buyınça eşlänä, dip belderelä älege rezolütsiädä. Bu miting turında reportaj televidenie aşa kürsätelde, İnternet säxifälärenä quyıldı.

XS
SM
MD
LG