Accessibility links

пәнҗешәмбе, 8 декабрь 2016, Казан вакыты 05:16

Aqçalar qaya oça?


Ğinwarnıñ soñğı atnasında hawa temperaturası da, ictimaği-säyäsi wäzğiät tä sülpän diärgä mömkin. Prezident Mintimer Şäymiev Şwetsariädä yal itä. Däwlät Sovetı räise Färit Möxämmätşin düşämbe könne aldınğı xezmätkärlärgä häm tärtiple çinovniklarğa däwlät büläklären tapşırdı. Premyer-ministr Röstäm Miñnexanov ğädättägeçä finans häm iqtisad mäs’äläläre buyınça qatlawlı rebuslar çişä. Elektr energiäsenä, kvartirlar xezmätländerügä bäyälär artqaç, xalıqnıñ aqçağa susawı qazna qapçığınıñ buş buluı belän bäyle. Dimäk, xökümät aqça ezli, çığımnarnı qısqartırğa tırışa.

Yäkşämbe könne efirğa çıqqan “Tatarstan – itogi nedeli” tapşıruında Leonid Tolçinskiy häm başqa xäbärçelär eşquarlıq departamentı citäkçese Nuri Mostafayevnıñ uzğan yıldağı eşçänlegen kisken tänqitläp çıqtılar. Döresräge, eşquarlar öçen maxsus buldırılğan fondtan aqçalar uñğa-suñğa sibelgän, dip äytelde. Çit illärgä säfärgä barıp, xalıq promısellarında eşlängän suvenirlarnı kürsätü, ekzotik däwlätlärgä barıp täcribä urtaqlaşu öçen küp kenä aqça totılğan, dielde. Qazan-Mamadış yulında 130-nçı çaqrımda, avtobuslar tuqtalıp, passajirlarnı öçpoçmaqlar, çäylär belän sıylıy torğan maxsus pavilyon eşlätkän öçen dä Mostafayevqa eläkte. 3 million aqçanı salıp, faydasın qaytaru çarasın kürmägän öçen. Äytergä kiräk, eşquarlarğa yardäm itü departamentın tänqitläwçelär – üzläre eşquarlar. Xökümät qarşındağı eşquarlıqnı üsterü agentlığın ber yıl buyınça Aleksandr Sergeyev citäklägän ide. Xäzer bu agentlıqnıñ dilbegäsen alırğa “STEF” firması citäkçese İgor’ Privalovqa çirat citkän.

Soñğı waqıtta xakimiät urınnarında tatarlar kübräk utıra, digän ğäybätlär çığarılsa da, xälitkeç urınnarda häm aqça bülgän kabinetlarda tatarlar siräk oçrıy. Glavalar häm deputatlar küp bulu säbäple, yaña urınnar buşağan sayın, anda hiçşiksez ruslar quyıla. İgor Privalov üze Bakuda tuğan, Qazan ximiä-texnologiä institutın tämamlağan, Qazaxstanda eşlägän, soñğı yıllarda Qazanda tözeleş oyışmasında eşlägän, şähär Sovetı deputatı bulıp tora, “STEF” dip atalğan xosusıy firmada uñışlı eşli ikän. Xäyer, aqçalı urında utıruçı keşeneñ milläte härwaqıt millätkä faydalı bulmıy. Tatar familiäle keşelär aqça eşlägändä üz millätennän bigräk üz törkeme, firması turında kübräk uylıy. Ğömümän, aqça turında söyläşkändä, ğädättä, tatar telendä sayraşmıylar. İnde eşquarlıqnı üsterü agentlığı tärtäne qaya taba borır – monısın äytep bulmıy.

XS
SM
MD
LG