Accessibility links

шимбә, 10 декабрь 2016, Казан вакыты 04:21

BMOnıŋ Iminlek Şurasında Ğıraq belәn qәnәğәtsezlek arta barsa da, qatıraq çaralar kürü mәsәlәsendә urtaq fiker yuq.


BMO Iminlek Şurasında ağza bulğan illәrneŋ diplomatları, BMOnıŋ qoral inspektorlarınıŋ başlığı Blixnıŋ tәnqitle çığışınnan soŋ, Ğıraqnıŋ qoralsızlanuğa mөnәsәbәtenә borçılalar. Lәkin, Ğıraqnı Şuranıŋ rezolutsiәsen ütөrgө etөrü өçen nindi çaralar kürü mәsәlәsendә fikerlәr ayırıla. Çәrşәmbe kiçen Iminlek Şurası ağzaları yabıq işeklәr artında Blix hәm ElBaradai belәn oçraşalar. Bәlkim bu Şura ağzalarınıŋ pozitsiәlәren yaqınlaştıruğa yardәm itәr.

Iminlek Şurasındağı oçraşu Ğıraqnıŋ inspektorlar belәn xezmәttәşlek dәrәcәse belәn qәnәğәtsezlek arta barğan vaqıtqa turı kilde. Ul Blix belәn ElBaradaidan ximik, biologik hәm atom raketaları mәsәlәsendә өstәmә mәğlümәt aluğa hәm ber ük vaqıtta Şura ağzalarına üz pozitsiәlәren aŋlatuğa mөmkinlek birә. Küpkenә illәr Ğıraqnıŋ BMOsı inspektorları belәn xezmәttәşlek dәrәcәsenә qәnәğәtsezlek belderdelәr inde. AQŞ belәn Britaniә Ğıraqnı citdi nәticәlәr kөtә dip kisәtkәndә, başqa qayberlәre inspektorlarğa küberәk vaqıt birergә kirәk digәn fikerdәlәr. Kәrim Qamal әytkәneçә, prezident Buş ilneŋ xәle turındağı yıllıq çığışında, Dәvlәt Sekretarı Collin Powellneŋ 5-nçe Fevraldә Iminlek Şurasına Ğıraq turında өstәmә dәlillәr tapşıraçağın belderde. Bәlkim bu Şura ağzaların Ğıraqqa qarşı qatıraq çaralar kürergә kirәk digәn fikergә kilülәrenә etәrer. Iminlek Şurasınıŋ daimi ağzası Russiә , bu dәlillәrdәn elek ük xezmәttәşlek itüe өçen Ğıraqqa basım yasarğa kirәklegen belderde. Prezident Putin Kiyevtә yasağan çığışında bu xaqta bolay dide:

Audio

Misır prezdentı Mubaraq ta Ğәrәp gazetasına birgәn intervyusında Ğıraq Iminlek Şurasınıŋ rezolutsiәsenә buysınmasa hәm inspektorlarına kirtәlәr quyuın dәvam itsә, ul xәrbi orımğa duçar bulaçaq dip kisәtte. Şıraq prezidentı Saddamnıŋ өlkәn kiŋәşçese Amir Raşit, inspektorlarnıŋ xisabı balanslı tügel ide hәm ul çınbarlıqnı çağıldırmıy dip belderde. Raşid Ğıraqnıŋ massa külәm yuq itü qoralları yuq dip tә әytte. Inspektorlar isә Ğıraq rәsmilәre belәn küzәtüsez әngәmәlәr dә ütkәrә almıylar. Bu alarnıŋ eşen qıyınlaştıra. Iminlek Şurasınıŋ bügenge hәm 5-nçe Fevraldә bulaçaq utırışları, anda ağza bulğan illәrneŋ pozitsiәlәren azmı-küpme açıqlauğa hәm şulay uq Ğıraqnıŋ nindi dәrәcәdә xezmәttәşlek itüen bilgelәvgә өleş kerter dip kөtelә.

Fәrit Idelle, Praga.
XS
SM
MD
LG