Accessibility links

якшәмбе, 11 декабрь 2016, Казан вакыты 09:19

George Bushnıñ yıllıq yullaması - Amerika Ğiraq suğışına yaqınayamı?


Çärşämbegä qarşı töndä Amerika Quşma Ştatlarınıñ prezidentı George Bush Kongressnıñ ike palatası aldında da yıllıq yullaması belän çığış yasadı. Anı ul berençe çiratta amerikan xalqına Ğiraqqa qarşı suğış başlawnıñ ni öçen kiräk buluwın añlatuğa häm moña yaqlaw qazanuğa bağışladı diärgä mömkin. Quşma Ştatlar prezidentı şulay uq Waşington tizdän Ğiraqnıñ küpläp yuq itü qorallarına iä bulğanın kürsätkän dälillär bäyän itäçägen dä belderde.

Amerikan prezidentlarınıñ Kongress qarşında yıllıq yullama belän çığu tarixı 18-nçe ğasır azaqlarınnan uq kilä, xörmätle tıñlawçılar. Quşma Ştatlarnıñ Britaniädän bäysezlek alu belän qabul itelgän Konstitutsiäsendä, ul (yäğni Prezident) ara-tirä Kongressqa berlekneñ xäle turında mäğlümat birep torırğa tieş dip yazılğan. Berlek dip biredä, britan patşalığınnan ayırılıp çıqqan amerikan ştatlarınıñ yaña berläşmäse küz aldında totıla. Şunnan birle inde 2 ğasırdan artıq waqıt ütsä dä berdäm däwlätkä äylängän Quşma Ştatlarnıñ prezidentları yıl sayın ilneñ Kongressına üz yullamasın cibärä häm anda alar ğädättä üz xakimiate çorında nindi uñışlarğa ireşüwe xaqında süz alıp bara. George Bush isä bu yulı, üz qazanışlarına tügel, ä alda torğan awır burıçlarğa basım yasadı. Çığışında ul Quşma Ştatlarnıñ sülpänäyä barğan iqtisadı üseşe, keşelärne klounlaw, Afrikada cäyelgän AİDS çire häm Tönyaq Koreäneñ atom programması, İrandağı irekleklär kebek möhim mäs’älälärgä qağılsa da, yullama üzägendä älbättä Bagdad tordı. Prezident Bush, ägär dä Berläşkän Millätlär Oyışması Ğiraqnı qoralsızlandıru eşendä uñışqa ireşä almasa, Saddamnı qoralsızlandırırlıq xalıqara berläşmäne Amerika üze citäkläyäçäk dip belderde.

Audio

Ägär dä bez suğış başlarğa mäcbür qalabız ikän, bez monı bar köçebez, Quşma Ştatlarnıñ bar xärbi qüwäte belän alıp baraçaqbız, häm bez barıber ciñäçäkbez dip belderä amerikan prezidentı. Dönya cämäğätçelegeneñ Ğiraqqa qarşı suğış başlaw mäs’äläsendä äle haman da saq itüwen häm anıq dälillär kötüwen iskä alıp bulsa kiräk Bush, 5-nçe fivraldä Berläşkän Millätlärneñ İminlek Şurasın cıyıp anda Ğiraqnıñ tıyılğan qorallar eşläp çığaruwı xaqında däwlät sekretare Colin Powellnıñ çığış yasawın täqdim itte. Bush süzlärenä qarağanda, Quşma Ştatlarda Ğiraqnıñ inspektorlardan üzendäge küpläp yuq itü qoralların yäşerüwen kürsätkän dälillär bar, häm Powell alarnı urtaqlaşa ala. Bush şulay uq, Ğiraq diktatorı Saddam bügenge köngä qädär üzendä bulğan 25 meñ litr tülämäneñ, 38 meñ litr botulinneñ, 500 tonna zarin gazınıñ qaya yäşerelüwe xaqında äytmäde, şuşı matdälärne qullana alırlıq 30 meñläp snarädneñ dä qayda buluwı bilgele tügel dip belderde. Ägär bu yawızlıq tügel ikän, dimäk dönyada andıy töşençä bötenläy yuq dip östäde Quşma Ştatlar prezidentı. Ul şulay uq Saddam xalıqara terrorğa da, ayırım alğanda äl-Qai’dägä yardäm itä digän ğäyepläwlär belän dä çıqtı.

Audio

Yäşeren xezmätlär çığanaqlarınnan, yäşeren aralaşudan häm xäzer saq astında bulğan keşelärdän alınğan mäğlümat, Saddam Xösäyenneñ terrorçılarğa, şul isäptän äl-Qai’dä äğzalarına yardäm itüwen açıp sala di George Bush. Älegä qädär Waşingtonnıñ mondıy ğäyepläwlär belän çıqqanı yuq ide, Saddamnı xalıqara terrorğa bäyläw Ğiraq suğışı ixtimalın arttıra ğına.

Kärim Kamal, Praga.
XS
SM
MD
LG