Accessibility links

шимбә, 10 декабрь 2016, Казан вакыты 21:44

Ministrlıqlarda tatar tele buyınça kurslar oyıştırıla


Ministrlar Kabinetı qarşındağı “Tatarstan Xalıqları tellären saqlaw häm üsterü” däwlät programması nigezendä Respublika ministrlıklarında tatar bulmağan xezmätkärlär öçen tatar telen öyrätü kursları oyıştırılğan ide. Menä nihayät Tatarstan Respublikası transport häm yul xucalığı ministrlığınıñ 15 keşese berençelärdän bularaq imtixannarın da tapşırdı. Kurslar 2002 yılnıñ 22 noyäbrennän 29 ğinwarğa xätle däwam itte. Şuşı ike ay eçendä ministrlıqnıñ äydäp baruçı belgeçläre, baş xisapçı, bülek citäkçeläre tatar telen şaqtıy ğına üzläştergän. "İmtixanda qayberläre xätta tatarlar da belep betermägän “buydaq” kebek süzlärne qullandı", - dip söyenüen belderde pedagogiä fännäre kandidatı, dotsent, pedagogik belem birü fännäre Xalıqara Akademiäse akademigı Näcip Şakircanov. Ämma ministrlıqta eşläwçelär arasında, tel öyränü xisabına kitkän aqçanı xezmät xaqınnan kisäçäklär, närsägä kiräk ul ruslarğa tatar tele diüçelär dä bulğan. Şuña da qaramastan Şakircanov ta, tatar telenä uqıtqan Zarema Xuciäxmätova da ministr Vladimir Şvetsovqa räxmätle. Ul älege eşkä zur teläktäşlek beldergän.

Tatarstan Xökümäteneñ Tatarstan Xalıqları tellären saqlaw häm üsterü bülege başlanğıçı belän Milli-sotsial'-iqtisad institutınıñ kadrlarnı tizlätelgän uqıtu üzäge cirlegendä başlanğan älege ğämäl xäzer Respublika rayonnarında da oyıştırılıp bara. Yäşel Üzän rayonınıñ Tatarstannıñ säwdä häm tışqı iqtisaq ministrlığına kergän bülegendä bu kurslar inde eşli dä başlağan. Anda 17 keşe yöri. Ministrlıq xisabına professor Flera Safiullinanıñ kassetaları da taratılğan. Şulay uq bu kurslar Respublikanıñ 7 ministrlığında da eşli başlıyaçaq. Alar belän şartnamälär tözelgän inde.

XS
SM
MD
LG