Bişkäk. Qırğızstan prezidentı idaräse bügen, ilneñ Konstitutsiäsenä üzgäreşlär kertü maqsatında irtägä uzaçaq refendum aldınnan qırıs iminlek çaraları kertelüwen belderde. Bu berençe çiratta ildäge bar strategik qorılmalarğa häm tawış birü urınnarına qarıy. Anda östämä militsiä köçläre urnaştırılaçaq dip xäbär itä qırğız prezidentı idaräse. Anıñ belderüwendä, tawış birü könendä nindi dä bulsa problemalar çığaru omtılışları qanun nigezendä bik tiz häm qırıs räweştä bastırılaçaq digän kisätü dä bar. Referendumğa qarşı çaralar qayber oppozitsiä törkemnärennän kötelä, alar Konstitutsiägä täqdim itelgän üzgäreşlär prezidentqa tağın da kübräk wäkalät birä dip isäpli. Tawış birüdä qatnaşaçaq ike millionlap keşe, berniçä törle üzgäreş küzdä totılğan ber täqdimgä äye yäki yuq dip kenä cawap birergä tieş. Üzgäreşlär arasında, xäzer ike palatadan torğan parlamentnı ber palatalı ğına itü täqdime dä bar. Berniçä xalıqara oyışma şuşı referendumnı ütkärü şartları xalıqara taläplärgä turı kilmi dip belderde.
