Accessibility links

якшәмбе, 4 декабрь 2016, Казан вакыты 09:05

Colin Powell İminlek Şurasına nindi çığış äzerli?


Quşma Ştatlarnıñ däwlät sekretare Colin Powell çärşämbe könne Berläşkän Millätlärneñ İminlek Şurası utırışında çığış yasarğa äzerlänä. Monı üzeneñ yıllıq yullamasında prezident Bush täqdim itkän ide. Powell şul çığışında Ğiraqnıñ küpläp yuq itü qorallarına iyä buluwın kürsätkän dälillär kiterer dip farazlansa da, düşämbedä bäyän itelgän mäqäläsendä Powell üzeneñ turıdan-turı Ğiraqnı köçläp qoralsızlandıru kiräklege turında söyliyäçägen xäbär itte.

Däwlät sekretare Powell üzeneñ şul qaraşın, düşämbedä Wall Street Journal basmasında dönya kürgän maxsus mäqäläsendä bäyän itte. Anda ul, çärşämbedä İminlek Şurasın künderergä tırışqanda utırışta Ğiraqnı faş itkän bernindi dä dälil kitermäyäçägen, ä Şura äğzalarına turıdan-turı, Bagdadnıñ qoral inspektorları eşenä törleçä qomaçawlawın kürsätäçägen belderä. Prezident Bush üzeneñ yıllıq yullamasında Powellne tizdän İminlek Şurasına cibäräçägen äytkäç küplär, däwlät sekretare üz çığışında, amerikan küzläw oyışmaları tuplağan häm Ğiraqnıñ yäşeren qorallar citeşterüwen faş itkän dälillär kiterer dip uylağan ide. Powellnıñ Wall Street Journal basmasındağı mäqäläse şuşı ömetlärne sürelderü maqsatında dönya kürde bulsa kiräk. Amerikan däwlät sekretareneñ Şuradağı çışığı, anıñ äğzaların, Ğiraq mäs’äläsendä yaña qarar qabul itügä künderergä tieş, Waşington şul qararda turıdan-turı, kiräk ikän Saddamğa qarşı köç qullanuğa fatixa birüne teli. Ägär dä Powell çığışına aldan uq zur ömetlär bağlansa, ul kitergän dälillär axırğı çiktä İminlek Şurası äğzaların qänäğätländermäskä dä mömkin, şuña kürä ul cämäğätçelekne aldan kisätep quya. Waşingtonnıñ üzendä soñğı atna, amerikan küzläw oyışmaları qulına töşergän fotosürätlärne, törle tekstlarnı häm başqa yäşeren mäğlümatnı barlaw belän ütte, alarnıñ qaysısın Powell çığışında faydalanu mäs’äläse xäl itelä. Moñardan tış Waşingtonda Saddamnı ni däräcädä xalıqara terror çeltärenä, ayırım alğanda äl-Qai’dä törkemenä bäyläw tiräsendä qatı bäxäslär bara. Aq yort häm saqlanu ministrlığı Pentagon, şul bäyläneşne mömkin qädär nığraq itep kürsätüne yaqlıy, gärçä Üzäk Küzläw İdaräse CIA häm Federal’ tikşerenülär idaräse FBI tuplağan dälillär monıñ öçen älegä citärlek tügel dip xäbär itelä amerikan başqalasınnan. Şuña kürä bu Powell çığışınıñ iñ zäğif öleşe bula ala. Quşma Ştatlarğa Saddamnıñ xalıqara terrorğa bäyle buluwın kürsätü ifrat ta möhim, ul oçraqta Ğiraqqa qarşı xärbi çaralar kürüne aqlıysı, häm älegä moña qarşı çıqqan illärneñ dä yaqlawın qazanası bermä-ber ciñeläyäçäk. Kiñ cämäğätçelek öçen dä, berençe çiratta Quşma Ştatlarnıñ üzendä, suğışnıñ kiräklegen añlaw küpkä artaçaq. Saddam häm terror digän temanı üzeneñ yıllıq yullamasında inde prezident Bush uq kütärgän ide, Powel monı tağın da tiränäytep xalıqara däräcägä kütärergä cıyına sıman. Däwlät departamentınnan alınğan xäbärlärgä qarağanda anıñ çığışı mäxkämä utırışılarındağı kebek alay uq täfsille bulmayaçaq, ul berençe çiratta Ğiraq citäkçelegeneñ qoral inspektorlarınnan bar näzäqätle mäğlümatnı yäşerergä tırışqan eşçänlegen açıp salaçaq. Häm şunıñ aşa Waşington, Ğiraq suğışınıñ kiräklegenä bik şiklänep qarağan qayber illärne üz yağına awıştırırğa tırışıçaq. Älegä qädär Quşma Ştatlarnıñ Ğiraq sääyäsäten kire qağıp kilgän Fransiä häm Rusiä, misal öçen, İminlek Şurasında yaña qarar qabul itü belän nigezdä kileşä aluwına inde işarälär yasadı da. Üz mäqäläsendä Powell berektäşläre belän bulğan qarşılıqlarnı telgä alıp, bez alarnı beterü ölkäsendä eş alıp baraçaqbız dip wäğdä itä.

Kärim Kamal, Praga
XS
SM
MD
LG