Accessibility links

сишәмбе, 6 декабрь 2016, Казан вакыты 08:43

Tatarstan “yevropaça bazar” qoraçaq


İqtisadıy mäsälälär, yañalıqlar turında mäğlümat, xäbärlär Ministrlar Kabinetınıñ sişämbe brifingında mul buldı. Brifing öç öleştän tözelde häm öç säğätkä yaqın bardı. Başta säwdä häm tışqı iqtisadi xezmättäşlek ministrı Xafiz Salixov söyläde. Brifingnıñ teması “Küpläp-azlap satu. Bazarlar. Sıyfat. Satıp aluçılar xoquqları” dip iğlan itelsä dä, ministr kübräk uzğan yıl yomğaqları turında söyläde. Monda barısı da äybät. Qullanu tawarların satu 2001 yıl belän çağıştırğanda 7% diärlek artqan. Tışqı iqtisadi xezmättäşlek dinamikası da äybät. Rusiä külämendä Tatarstannıñ säwdä, tışqı iqtisadi xezmättäşlege aldağı urınnarda, yaxşılar sanı arasında. Ä inde bazarlarğa, andağı tawar sıyfatına, aldaw-sıltawlarğa kilgändä, monısı qatlawlıraq mäsälä. Äye, ministrlıq bazarlardağı “bezobraziälär” turında xäbärdar. Uzğan yıl xalıqtan säwdägä, tawar sıyfatına 12 meñ keşedän şiqäyät kilgän. Şunıñ 80% tawar sıyfatı, säwdä qağidäläre bozıluğa. Läkin bazarlarda satu-alu tärtibeneñ zakonçılıq nigezlämäse bik say. Barısın da däwlät, yäğni ministrlıq kontrolendä totu mömkin tügel.

Problema niçek xäl iteler soñ? Qısqa ğına itep äytkändä, “yevropaça”. Eş şunda ki, Fransiä, Germaniä kebek illärdä bazar säwdäse barlıq säwdäneñ 3-4% ğına täşkil itä ikän. Tatarstanda bu kürsätkeç xäzer 50% çaması bulsa, 2006 yılğa 17% qına qalaçaq. Tatarstanğa “Metro Kaşinkari” kebek transnatsional', “Aşan”, “İkea” kebek tanılğan säwdä firmaları kilä. Tağın 2-3 yıldan älege firmalar Qazanda fälän meñ kvadrat metr mäydanlı gipermarketlar açıp cibäräçäklär. Şulay itep, tağın 3-4 yıldan Tatarstan, härxäldä Qazan, pıçraq, tärtipsez qırği bazarlarğa “до свидания” dip äytüe bik mömkin ikän.

Brifingnıñ ikençe-öçençe öleşläre dä şulay şoma ğına bardı. Tatarstannıñ antikrizis idäräse komitetı räise Aleksey Semin “Bölgenlek (bankrotlıq) turında” uzğan yılnıñ 3 dikäberendä çıqqan yaña federal' qanunnı ütäw öçen birelgän küçeş çorı öç ay urınına Tatarstanda ike ayda uñışlı başqarılu turıda äytte.

Brifingnıñ öçençe öleşe tağın da küñelleräk buldı. Rusiä Federatsiäse Pensiä wäqıfınıñ Tatarstan bülegeneñ mödire Ayrat Şafiğullin 2 fivraldän pensionerlarğa pensiälär yañaça, yäğni tieşençä arttırıp isäpläp tapşırılaçaq, dip belderde.

Yunıs Ätnäle, Qazan

XS
SM
MD
LG