Accessibility links

якшәмбе, 4 декабрь 2016, Казан вакыты 07:02

Dönya citäkçeläre Powell çığışı turında


Bügen, küp kenä däwlät citäkçeläre, Ğiraqqa qarşı suğış başlar öçen, BMOnıñ yaña rezolutsiäse bulırğa tieş, digän fikeren qabatladı.

Yaponiä premier-ministrı Juniçiro Koizumi bu çığıştan soñ Ğiraqqa qarata şiklär tağı da arttı, läkin suğış başlar öçen, Berläşkän Millätlär Oyışmasınıñ yaña rezolutsiä qabul itüwe zarur, dip äytte.

Germaniäneñ opozitsiä citäkçese Angela Merkel, räsmi Berlinnı, Ğiraq suğışına qarata fikeren üzgärtergä çaqırdı. Läkin kansler Gerhard Şröder, Ğiraqqa qarşı xöcüm başlawğa German xökümäte qarşı toruwın däwam itä, dip belderde. Berük waqıtta ul, Ğiraqta küpläp üterü qoralı bulu xäbärenä borçılu belderde, häm Fransiä täqdimenä quşılıp, Ğiraqta tikşerü eşlären köçäytergä çaqırdı. Quşma Ştatlarnıñ Berlindağı ilçese, Powel çığşınnan soñ, Germaniä häm Fransiäne Ğiraq suğışına qaraşın qabat küzdän kiçerergä soradı.

Avstralia premier-ministrı John Horward, Ğiraqnıñ BMOnı aldap yörgäne, Powell çığışınnan açıq kürenä, dip äytte.

Yevropa Berlegeneñ Tışqı säyäsät öçen cawaplı wäkile Havier Solana, bu çığış bik möhim, läkin Yevropa Berlege BMOnıñ fatixası bulmıy torıp, Ğiraqta suğış başlawğa qarşı, dide.

İtalia premeir-ministrı Silvio Berlusconi, Ğiarqnıñ ğämällärenä tieşle qatı cawap bulırğa tieş, dip äytte.

Törkiä prezidentı Äxmät Nacdät Säzär, yaña rezolutsiä kiräklegen äytte.

İndonezia, inspektorlarğa kübräk waqıt birergä kiräk digän fikerlärgä quşıldı.

Süriäneñ BMOdağı ilçese, Quşma Ştatlar Ğiraqta küpläp üterü qoralı buluğa dälil kiterde, dide.

XS
SM
MD
LG