Accessibility links

сишәмбе, 6 декабрь 2016, Казан вакыты 23:02

Tufan Miñnullin: «Bez, bütännär üz tütällärendä çäçäk üstergändä, şul tütällärne aşlawçı aşlamağa äylänä barabız. Ägär şuşı xaqiqätne añlamasaq, bez betäçäkbez.» [ Tatarstan yäşläre ]<br><br>Räşit Äxmätov: «Mortaza Räximovqa Tatarstanğa küçep kilergä turı kilmägäye.» [ Звезда Поволжья ]


Tatarstan yäşläre gäziteneñ pänceşämbe sanında Tufan Miñnullinnıñ «Tireskä äylänmik» dip isemlängän açıq xatı dönya kürde. Ul xatında, Tufan äfände, Kamil Tanğalıçev digän keşegä möräcäğät itä. Küptän tügel, Tatarstan mäğärif ministrlığı wäkilläre, tatar zıyalıları Mordoviägä barıp qaytqan ide. Ütkän yäkşämbe könne, Hadi Taqtaş, Şärif Qamal, Ali Aqış, Şämsiä Apaqay kebek tanılğan millättäşlärebezneñ tuğan yaqları xaqında maxsus tapşıru da yañğıradı. Bu tapşıruda, radionıñ Qazan bülege mödire Rimzil Wäli Mordoviädä icat itüçe Kamil Tañğalıçev häm anıñ icatı xaqında söyläde. Mordoviägä baruçılar arasında deputat häm dramaturg Tufan Miñnullin da bar ide. Ul da, yäş şaqır Kamil Tañğalıçev icatı belän tanış. «Kamil tuğan! Qälämdäşem!..» - digän süzlär belän başlanıp kitkän açıq xatında Tufan Miñnullin Mordoviädäge bu şağirgä üzeneñ uy-fikerlären citkerä.

Sineñ yazğannarıñ minem canğa barıp citmi, bezneñ küñellär arasında kirtä tora», - di Tufan Miñnullin. Tatarnıñ ber balası ikençe ber tatar balası belän çit teldä söyläşä, dip sızlana avtor.

Mordoviädä bulğanda, Lämberä rayonı xakimiäte başlığı Qäbir Älmäşev Kamil Tañğalıçev şiğerlären Qazanda, tatarçağa tärcemä itep, bastıru telägen äytkän bulğan. Moña Tufan Miñnullin, qatğıy räweştä, qarşı çığa:

Sin tatar telen şaqşı beläseñ, sin tatarça yazarğa tieş, yäki sin tatarça da yazarğa tieş. Ul sineñ millät aldındağı burıçıñ, babalarıña tülänergä tieşle burıçıñ,- dip möräcäğät itä ul Kamil Tañğalıçevka. Şulay, Kamil tuğan, Bez, bütännär üz tütällärendä çäçäk üstergändä, şul tütällärne aşlawçı aşlamağa äylänä barabız. Ägär şuşı xaqiqätne añlamasaq, bez betäçäkbez,- dip yaza Tufan Miñnullin.

Bu fikerlär ayırım ber avtorğa ğına tügel, ä kiñräk dairälärgä yünälğänğä kürä, Tufan äfände anı açıq xat itep, Tatarstan yäşläre gäzitenä bastırıp çığara. Kamil Tañğalıçev niçek cawap birer häm nindi teldä? Busı äle bilgele tügel, kötep qarıyq...

Звезда Поволжья gäziteneñ yaña sanında, baş möxärrir Räşit Äxmätov, saylaw aldı kompaniäseneñ başlanuın bilgeläp ütä häm üzeneñ säyäsi ğäybätlär taratu ğädäten däwam itterä. «Tatar manevrları» digän mäqälädä ul, Başqortstandağı saylawlar temasına tuqtala. Niçä protsent tatar parlamentta urın yawlıy alır, Bäläbäy tatar gimnaziäseneñ qıyu direktorı saylanırmı, Prezident saylawlarında kem ciñär, digän sorawlar quya avtor.

Başqortstanda yaña Prezident saylansa, ä anıñ urıs bulu ixtimalı zur, bu Tatarstan öçen dä yaña säyäsi manzara açaçaq. Räximovqa Tatarstanğa küçep kilergä turı kilmägäye. Anıñ zur gäwdäsen Qazan uramnarında kürü qızıq bulır ide. Anıñ, Xruşçev kebek, pensiägä çıqqaç dönyağa qaraşların üzgärtüenä şiklänäse yuq. Ägär ul tatarlarğa qarata yomşağraq säyäsät alıp barğan barsa, anıñ respublikadağı pozitsiäse dä nığraq bulır ide, häm anı yañadan saylaw mäsäläse quyılmas ide. Bälkem, kiter aldınnan ul aqılına kilep, tatar telenä däwlät tele däräcäsen birer,- dip yaza Räşit Äxmätäv.

Ul, şulay uq, Tatarstanda deputat saylawları bu yılnıñ dekaberendä bula, yaña parlament belän elekkeçä idärä itep bulmayaçaq, Prezidentnıñ säyäsi kiñäşçese Rafael Xäkimovnıñ Duma deputatı bulıp kitüe mömkin häm Qazan başlığı Kamil İsxaqovnıñ may ayında eşsez qaluı kebek, bersennän berse qızıqlı farazlar bäyän itä. Yazmanıñ axırında ul, Kamil İsxaqov häm Mintimer Şäymievnı säyäsi köndäşlär dip atıy, häm alar arasında saylarğa täqdim itä. Häm şunda uq, küpçelek Şäymievqa tawış birer inde dip, üze quyğan sorawğa üze cawap ta birä.

Bikä Timerova, Qazan
XS
SM
MD
LG