Accessibility links

сишәмбе, 6 декабрь 2016, Казан вакыты 17:15

Germaniäneñ Münhen şähärenä 40tan artıq däwlätneñ räsmi wäkilläre ike könlek konferensiägä cıyıldı


Bügen Germaniäneñ Münhen şähärendä 40tan artıq däwlätneñ räsmi wäkilläre qatnaşında ike könlek konferensiä açıldı. Amerika Quşma Ştatları saqlanu ministrı Donald Rumsfeld, böten illär Ğiraq mäs’äläsendä qatı pozitsiädä torırğa , häm kiräk bulsa xärbi köç qullanırğa äzer bulırğa tieş, dip belderde. Suğış başlau-ciñel tügel, dide Rumsfeld, läkin çarasızlıq ta qurqınıç ber äyber, dide Rumsfeld:

Añlatam sezgä-ber kem dä suğış telämi. Suğış-berençe häm iñ ciñel adımnarnıñ berse tügel. Läkin kübräk närsädän qurqınıç yanıy? Suğıştanmı, yäisä Ğiraqqa qarşı çaralar kürelmägän xäldä anda küpläp üterü qorallarınıñ citeşterelüennänme? menä monı döres bäyälärgä kiräk, dide Rumsfeld.

Yevropanıñ öç ile –Germaniä, Fransiä häm Berlgiä- Ğiraq suğışında Törkiägä xärbi yardäm kürsätergä qarşı çığa. Donald Rumsfeld, Törkiäne saqlau-NATOnıñ burıçı, dip belderde. Ğiraq Törkiägä höcüm yasıy qalsa , NATOğa kergän böten däwlätlär NATO äğzası bulğan Törkiägä yardäm kürsätergä tieş. Törkiäne saqlau çaraları turında täqdimnär inde äzer, qarşı çığışlar bulmasa, älege täqdimnär düşämbe könne qabul iteläçäk.

Germaniä tışqı eşlär ministrı Joscka Fischer, räsmi Berlinnıñ üz pozitsiäsendä qaluın belderde. Mäğlüm bulğança, Germaniä, nizaqnı Ğiraqqa qarşı xärbi çaralar başlamıyça da xäl itep bula dip sanıy:

Minem uylawımça, suğış kiteräçäk qurqınıçlarnı iskä alıp , bez aña qadär, bulğan böten çaralarnı qullanunıñ ni qadär möhim bulğanın añlarğa tieş. Xärbilärneñ qotqısına birelergä yaramıy, inspektorlarğa tağın waqıt birep bez dä şul waqıtnı, tağın başqa alternativalar uylap tabu öçen qullanırğa tieş, dide Germaniä tışqı eşlär ministrı.

Rumsfeldnıñ, Yevropada älege mäs’älädä fikerläre ayırıldı digän süzlären Joschka Fischer kire qaqtı, cämäğätçelek suğışqa qarşı, dide Fischer.

Rusiä saqlanu ministrı Sergei İvanov Münhenda, ağulı рицин toksinın citeşterüne Çeçen suğışçıları başlağan bulırğa mömkin, dip belderde. Mondıy näticä, Gruziäneñ Pankisi tarlawığında ağunı citeşterü urınnarı tabılğannan soñ yasaldı. Çeçen terrorı , dide İvanov, törle illärdä bulğan terror höcümnäreneñ ber öleşe. Şunıñ öçen, terrorğa qarşı suğışnı berlektä alıp baru möhim, dide İvanov:

Bügenge köndä, bez barıbız da, terrorğa qarşı koalitsiäneñ berdäm buluınıñ ni qadär möhim ikänen añlarğa , xäzerge waqıtta inde bulğan xezmättäşlekne saqlap qalırğa kiräklegen tanırğa tieş. Yuqsa bezneñ bu eşebez –näticäsez bulaçaq, dide Rusiä saqlanu ministrı Sergei İvanov.

Germaniä politsiäse, uzğan töndä, konferensiädä qatnaşuçılarğa qarşı çaralar oyıştırırğa äzerlänüdä şiklänelgän 23 keşene qulğa aldı.

XS
SM
MD
LG