Accessibility links

NATO General’ Sekretare George Robertson Ğiraqta suğış başlanğan oçraqqa äzerlänü öçen xärbi planlaştıruğa bäyle NATO eçendäge bäxäsne bik citdi dip bäyäläde.


Bügen Törkiä NATO kileşüeneñ 4-nçe matdäse nigezendä räsmi kiñäşläşülär sorap möräcäğät itkännän soñ, Robertson NATO äğzaları zur iğtibar häm omtılış belän konsensus öçen tırışa dide.

AUDİO: Bu, hiçşiksez, qiın wäzğiät. Ämma berektäşlär arasında fiker ayırmalıqları elek tä buldı häm, hiçşiksez, kiläçäktä tağın da kübräk bulaçaq. İñ möhime konsensus tabu. Häm min anı tabarbız dip ışanam.

Belgiä, Fransiä häm Germaniä Ğiraqta suğış bulğan oçraqta Törkiäne saqlaw öçen küzläw oçqıçları, raketalar häm ximik-biologik suğış belgeçläre törkeme cibärüne planlaştıruğa qarşı çıqqannan soñ Ankara kiñäşläşülär ütkärergä çaqırdı. Quşma Ştatlar 3 atnadan artıq inde NATOnı xärbi planlaştıru eşlären başlarğa çaqırıp kilä. AQŞnıñ NATOdağı ilçese Nicholas Burns NATOdağı 3 äğzanıñ Törkiäne saqlawnı planlaştıruğa qarşı çığuı säbäple oyışma xäzer ışanıç krizisı kiçerä dide.

Xäzerge waqıtta Yewropa Berlegendä prezidentlıq itüçe Gretsiä Ğiraq mäs’äläsenä bağışlanğan aşığıç sammit cıyaçağın belderde. Gretsiä tışqı eşlär ministrı George Papandreou Gretsiä, bu comğada BMO qoral tikşerüçeläre başlığı Hans Blix BMO İminlek Şurasında Ğiraqnıñ qoralsızlanu yöklämälären niçek ütäwe turında xisap birgännän soñ Yewropa Berlegeneñ närsä eşliäçäge turında söyläşü öçen sammit ciarğa buldı dide. Sammitnıñ qayçan bulaçağı älegä bilgele tügel.
XS
SM
MD
LG