Accessibility links

җомга, 9 декабрь 2016, Казан вакыты 18:24

Qorban bäyrämeneñ säyäsi şäwläse.


Tatarstanda bıyılğı qorban bäyräme aldan kötep alınğan, bik citdi çara bularaq qabul itelde. Berençedän, Qorban bäyräme Tatarstan qanunnarında yal köne dip bilgelängän, şuña kürä düşämbe kön urınına şimbädä eşlägän räsmi oyışmalar, Qorban bäyräme aldınnan, eşkä çıqmadı. Şulay itep, yäkşämbe, düşämbe häm sişämbe - 3 kön rättän Tatarstanda yal könnäre buldı.

İkençedän, soñğı yılda islam dine, möselmannar tormışı tiräsendä ığı-zığılar arttı. Poçmaq sayın wahabilarnı ezläw, Tatarstannıñ häm tatarlarnıñ abruyın töşerü kampaniäse kiñ qolaç alğan ide. Mondıy şartlarda, ğömümän, Rusiädä möselman bulu, islam ğoreflären, yolaların ütäw kiräkmägän, şikle eş kebek toyıla başlağan ide. Respublikada pravoslav dinen totuçılar, urıslar, keräşennär tiräsendäge agitatsiä çaraları tirän ez qaldırdı. İnde bäyräm köne citkäç, Tatarstanda Qorban ğäyete häm traditsion Qorban çalu ğädättägedän dä zurraq, mäğnäleräk ikänlege kürende.

Tatarstan möselmannarın häm respublika xalqın Mintimer Şäymiev täbrik itte, möfti Ğosman İsxaqi, Xacğa kitär aldınnan televideniedä täbrik süzlären yazdırıp qaldırğan.

«РТР» kanalı irtänge 8-dän soñ Mäskäw Cämiğ mäçetennän barğan ğäyet namazınnan reportaj birä başladı. Rusiä möftiläre şurası citäkçese Rawil Ğäynetdin Rusiä Prezidentı Vladimir Putin, xökümät başlığı Mixail Kasyanov, Duma citäkçese Gennadiy Seleznyovnıñ, Mäskäw merı Yuri Lujkovnıñ, Rusiäneñ iñ kürenekle partiä başlıqlarınıñ täbrik süzlären citkerde. Şul uq waqıtta, ul böten Rusiä xalqına möräcäğät itte, Tatarstan Prezidentı Mintimer Şäymievneñ Qorban bäyräme belän izge teläklären tapşırdı. Älbättä, Rusiädä säyäsi häm millätara xällär kierenkeläşkän waqıtta mondıy ğämälneñ säbäplären añlap bula. Däwlät dumasına saylawlar, annan soñ Rusiä Prezidentın saylaw ğädättä möselmannarğa, tatarlarğa märxämät kürsätmägän däwlät başlıqlarınıñ da küñelen yomşarta. Şulay da, Tatarstan Prezidentınıñ üz qärdäşlärenä mönäsäbäten böten Rusiägä işetterü, häm Qorban bäyräme könendä räsmi Rusiä kanalında saf tatarça çığışlar yañğırap toruı cannarğa şifa yaqtı diärgä mömkin.

Xäyer, Tatarstanğa bik uk cılı qaramağan Tälğät Tacetdin da, çittä qalmıy. «Известия» gazetası, üzen Rusiäneñ baş möftie dip iğlan itkän Tacetdin belän turı elemtäne 12 fevral'gä bilgelägän. Bıyılğı bäyrämgä Ğiraqta suğış başlanu mömkinlege, andağı operatsiägä yul quymaw öçen zur däwlätlärneñ aktivlıq kürsätüe dä tä’sir itä buğay. Härxäldä, Rusiädä möselmannarğa qarata cılılıq sizelep tora, alarğa gel terrorçı itep qaramıylar. Amerikanıñ Ğiraqqa höcüm itmäwen sorawçılar mondıy şartlarda tağın da arta töşärgä mömkin.

XS
SM
MD
LG