Accessibility links

чәршәмбе, 7 декабрь 2016, Казан вакыты 17:38

Qazanda tağın ber käräzle elemtä kompaniäse eşli başladı


Çärşämbe könne Qazanda tağın ber käräzle elemtä kompaniäseneñ cirle bülekçäse açıldı. Bu yulı Qazanğa Mäskäwneñ «Megafon» firması kilde. Soñğı yartı yıl eçendä genä dä bu inde Tatarstan cirenä kilgän öçençe kompaniä. «Megafon»ğa qädär respublikada «Beeline» häm «SMARTS» kompaniäläre eşli başlağan ide. Şulay itep, Tatarstanda, Qazanda bügenge köndä inde berniçä şundıy kompaniä eşläp kilä. Äle küptän tügel genä mobil telefonnarnı çit il kinolarında ğına kürergä künekkän tatarstanlılarnıñ şaqtıy öleşe xäzer üzläre şundıy telefon, xätta berniçä kompaniäneñ telefonı belän yöri. Respublikada käräzle elemtäneñ berençe qarlığaçları bulğan cirle firmalarğa da xäzer awırğa turı kilä. Üzläre genä bulğanda alar, törle standartlarda eşläw säbäple, bernindi konkurensiäsez, ber-berse belän köräşsez üzläre telägän bäyä quyıp eş itärgä öyrängännär ide. Xäzer isä, kiläçäktä dä yäşäp qalu öçen alarğa zur häm nıqlı kompaniälär belän çınlap torıp köräşergä turı kilä. Ä menä monısın inde kem niçek buldıra. Qaysı bäyäsen töşerä, qaysı törle büläklär wäğdä itä, kemder yaxşı elemtä belän qızıqsındıra. Xäyer, qullanuçılarğa bik äybät ikän, berençe çiratta bu köräştän alar fayda tabalar, dip şatlanırğa aşıqmağız. Bu köräşneñ tiskäre yaqları da şaqtıy. Mäsälän, ber kompaniäneñ telefonınnan ikençesenä şaltıratu qayber oçraqlarda bik awır yäisä qıybat närsägä äylänä. Ä qaysıları çit kompaniäneñ telefonı belän ğomumän totaştırmıy. Şulay itep, konkurentsiä kebek faydalı häm kiräk äyber dä bezdä üzeneñ tiskäre yaqların kürsätä. Xäyer, Qazanda çärşämbe könne räsmi räweştä eşli başlağan yaña kompaniä wäkilläre, alarnıñ telefonnarın qullanğanda mondıy problemalar kilep çıqmas, dip ışandırdılar. Anısı niçek bulır, älegä äytep bulmıy. Läkin inde bügen şunısın äytergä bula — Tatarstanda «Megafon»nıñ qullanuçıları da az bulmayaçaq. Bu xaqta älege kompaniäneñ berniçä ay barğan köçle reklaması häm bügenge räsmi açılu tantanasına kilüçelärneñ sanı äytep tora. Alar şundıy küp bulğan ki, xätta telefonğa totaşu ofisı yanında Qazanda inde sovet zamanınnan birle kürelmägän çiratlar xasil bulğan. Ä «Megafon»ğa bügen ük totaşırğa teläwçelärneñ qaynar teläklären militsiä xezmätkärläre yardämendä genä beraz suıtqannar.

XS
SM
MD
LG