Accessibility links

якшәмбе, 4 декабрь 2016, Казан вакыты 03:07

Osama bin Laden möräcäğäte anıñ Ğiraq citäkçelege belän bäyläneşe buluwın kürsätäme?


Ğiraq citäkçeläreneñ xalıqara terrorğa, berençe çiratta mäğlüm äl-Qa’idä törkemenä bäyle buluwın kürsätergä tırışqan Waşington öçen monı isbatlawğa yardäm itärlek yaña dälil tabıldı – Qatardağı äl-Cäziyrä telekanalı, 11-nçe sintäbr höcümnäre artında toruçı dip sanalğan Osama bin Ladennıñ çirattağı möräcäğte yazılğan tasmanı kürsätte. Läkin ul anda, dönya möselmannarın Ğiraqnı yaqlawğa öndäsä dä, berük waqıtta Bagdadtağı citäkçelekne kisken tänqitläp tä çığa. Häm bu Waşington tırışlıqların qatlawlandıra ala.

Terrorğa qarşı alıp barğan köräşne äkrenläp Ğiraqqa qarşı xärbi çaralar kürügä äyländerä barğan Quşma Ştatlar kötmägändä, iğtibar üzägenä yänä üzeneñ qan doşmanı, mäğlüm Osama bin Ladenneñ çığuwı aldında qaldı. Sişämbe könne Qatardağı ğäräp telekanalı äl-Cäziyrä anıñ çirattağı möräcäğäte yazılğan tasmanı bäyän itte.

Audio

Bez doşmanğa qarşı şähid höcümnäre oyıştırunıñ ähämiatenä basım yasıybız, Andıy höcümnär Amerikağa häm İzrailgä, alar üz tarixında älegä kürmägän zian kiteräçäk di, Osama bin Laden dip farazlanğan keşe. Monı älegä tulı ışanıç belän äytep bulmasa da, Osama belän elegräk oçraşqan qayber şäxeslär tasmağa yazılğan tawışnıñ anıqı buluwın äytä. Üz möräcäğätendä ul, Quşma Ştatlarnıñ Ğiraqqa qarşı suğış başlaw öçen sıltaw ezläwe artında töbäktäge neft baylıqların üz qulına alu häm anda İzrail östenlegen urnaştıru teläge yata dip belderä. Şuña kürä ben Laden dönyadağı möselmannarnı Quşma Ştatlarnıñ Ğiraqqa höcüm itüwenä qarşı çığarğa häm anı başlağan oçraqta Amerikadan üç alırğa çaqıra. Läkin berük waqıtta äl-Cäziyrä işettergän tasmada, Ğiraq prezidentı Saddam Xösäyenne, ğomumän andağı xakimiatne yaqlaw süzläre yuq, kiresençä, Osama Bagdadtağı xökümätne sotsialistik dip bäyäli häm ul käferlärdän tora dip belderä. Bu oçraqta barı tik Ğiraq xalqın yaqlaw kiräk di, xalıqara terrornıñ başında toruçı dip sanalğan şuşı keşe.

Audio

Köräş Allah xaqına ğına alıp barılırğa tieş, hiç kenä dä milli täğlimat yäisä bar ğäräp illärendäge, şul isäptän Ğiraqtağı da nadan xökümätlär ciñüwe xaqına tügel digän taläp quya bin Laden. Saddamnıñ äl-Qa’idä belän bäyläneşen isbatlarğa tırışqan Quşma Ştatlar öçen bu üzenä kürä awırlıq tudırsa da, däwlät sekretare Colin Powell kiresençä, älege belderü bäyläneşneñ buluwın kürsätä dip isäpli.

Audio

Min bin Ladennıñ, yäisä bez ul dip uylağan keşeneñ äl-Cäziyrägä äytkän süzlären tıñladım, anda ul yänä Ğiraq xalqına möräcäğät itä häm alarnıñ köräşe, üzeneñ Ğiraq belän xezmättäşlege turında süz alıp bara di Colin Powell. Häm, terrorçılar belän küpläp yuq itü qoralları eşläp çığarğan illär arasındağı bäyläneşlärne berniçek tä inkär itep, kürmämeşkä salışıp bulmıy dip belderä. Uzğan atnada amerikan citäkçelege, küzläw oyışmaları birgän mäğlümatqa tayanıp, äl-Qa’idä yaqın aralarda ilneñ üzendä häm annan çittä yaña höcümnär oyıştıra ala digän belderü yasağan ide. Senattağı tıñlawlarda Üzäk Küzläw İdaräse CİA-neñ mödire George Tenet, andıy höcümnärne xac azağında ike cirdä, Amerikanıñ üzendä häm Ğäräp yarımutrawında kötep bula dip belderde. Şul uq çığışında ul, äl-Qa’idä qaldıqları bügenge köndä Äfğanstan wä Pakstanda ğına tügel, Ğiraq belän İranda da bar dide. Ul arada çärşämbe könne Osama bin Ladennıñ möräcäğäten Pakstandağı töp islamçı partiälärneñ berläşmäsen citäklägän Şaxäxmät Nurani dä yaqlap çıqtı.

Kärim Kamal, Praga.
XS
SM
MD
LG