Accessibility links

шимбә, 3 декабрь 2016, Казан вакыты 03:35

Tatarstanğa Britaniäneñ Rusiädäge ilçese Roderic Lyne kilde


Köndälek räsmi xäbärlärdä Tatarstanğa Böyek Britaniäneñ Rusiädäge ğädättän tış häm tulı wäkälätle ilçese Roderic Lyne kilüe turında äytelä. İlçeneñ vizitı 14 fevral'gä qädär däwam itäçäk, vizit barışında säwdä häm tışqı iqtisadıy ministrlıq, Diniä näzaräte citäkçelege belän oçraşu qaralğan, dielä räsmi xäbärdä. Ä pänceşämbe könne Böyek Britaniä ilçese Alabuğada Tatarstan Däwlät Şurası räise Färit Möxämmätşin belän oçraştı. Eş şunda ki, Alabuğada Mäskäwneñ säyäsi tikşerenülär mäktäbe häm administratsiäse äzerlägän “Federalizm, töbäklär säyäsäte häm cirle üzidarä” digän xalıqara fänni-ğamäli konferensiä ütä. Xalıqara konferensiädä qatnaşuçılar Qazanğa çärşämbe könne ük cıyıldılar. Oyıştıruçılarnıñ başlap yörüçese säyäsi tikşerenülär mäktäbe direktorı Elena Nemirovskaya, 10 yıllıq tarixıbızda mondıy konferensiäne Tatarstanda täwge märtäbä ütkäräbez, dide. Temasın da belep saylap aldıq, çönki federalizm häm cirle üzidarä Rusiädä üsterelergä tieşle zamança demokratik däwlät institutları.

Mäskäwneñ säyäsi tikşerenülär mäktäbe citäkçeläre näq şuşı kürkäm süzlär söylägän könne respublikanıñ Yuğarı mäxqamäsendä Rusiä general' prokurorı urınbasarınıñ Tatarstan Konstitutsiäseneñ 19 maddäse federal' qanunnarğa qarşı kilüe häm 18 maddäseneñ yaraqsız ikänlegen tanunı taläp itkän ğarizasın qarawı turında işetkännärme-yuqmı - anısına kommentariylar yuq. Ä inde Qazanda çığa torğan “Новая вечёрка“ kebek oppozitsiädäge gäzitlärneñ soñğı waqıtta här sannarında iñ küp digändä sentyabr'dä Däwlät Şurası tarqatılaçaq, yaña şurağa çın demokratik pozitsiädäge deputatlar saylanaçaq dip yazıp toruları turında belmäwläre dä bik mömkin. Xalıqara konferensiä näticälärendä süzdä zamança demokratik federativ däwlät tözü turında, ä ğämäldä däwlätneñ federativ nigeznämälerenä, yäğni Tatarstan kebek ere federatsiä subyektınıñ qanunnarına, konstitutsiäsenä höcüm alıp barıluı çağılış tabarmı yuqmı? Härxäldä, Färit Möxämmätşin konferensiä näticälären 18 fevral'dä Mäskäwdä Rusiä prezidentı Vladimir Putin qatnaşlığında ütäçäk Federatsiä Şurasındağı çığışında qullanırğa niätli dielä räsmi xäbärdä.

XS
SM
MD
LG