Accessibility links

Кайнар хәбәр

Tony Blair: BMO Ğiraqnı qoralsızlandıra almasa, oyışmanıñ däräcäse yuqqa çığaşaq


Bügen Şotlandiäneñ Glasgow şähärendä çığış yasap, Britan premier-ministrı Tony Blair, Ğiraqta eşlägän qoral inspektorlarına eşlären beterü öçen kübräk waqıt birergä çaqırdı. Berük waqıtta, ägär Saddam Xösäin inspektorlar belän tulısınça xezmättäşlek itmäsä, Berläşkän Millätlär çara kürergä äzer bulırğa tieş, dide ul.

Audio: Min äle dä, Ğiraqnı tınıç yul belän qoralsızlandırıp bulır, dip ömetlänäm, di Blair. Läkin, ägär bez köçesezlek kürsätsäk, waqıt suzuğa yul quysaq, quqrınıç artaçaq, häm ber Saddamnan ğına tügel. Berläşkän Millätlär oyışması däräcäsen yuğaltaçaq.

Kiçä İminlek Şurasında BMOnıñ baş inspektorları Hans Blix häm Möxämmät Äl-Baradei xisap tottı. Alar Ğiraqta küpläp üterü qoralı älegä tabılmawın, läkin axır näticä yasar öçen östämä tikşerülär kirägen belderde.

Bügen Mäskäwdä Rusiäneñ Tışqı eşlär ministrı urınbasarı Yuri Fedotov, inspektorlarnıñ kiçäge xisabı, krizisnı tınıç yul belän xäl itergä şans birä dip äytte. Fedotov süzlärençä, Ğiraqqa qarşı köç qullanu öçen älegä ber nigez dä yuq.
XS
SM
MD
LG