Accessibility links

Кайнар хәбәр

“Tattransgaz, siña barlıq maqtawlar da az...”


Säyäsät cäyen-qışın da, irtäsen-kiçen dä, yal häm xezmät könnärendä dä tuqtalıp tormıy. Uzğan atna axırında Mintimer Şäymiev Mäskäwgä “Gazprom” tözelüeneñ 10 yıllığına bağışlanğan kiçädä qatnaşırğa barğan ide. Anda inde, üzegez beläsez, ğadi citäkçelär häm xälle ağaylar ğına tügel, ä bik zur keşelär cıyıldı. Televizordan üzegez kürgänsezder. Tatarstan prezidentı gaz çığarıp, anı torbalar buylap quuçılar arasında üz keşe. Başqortostan prezidentı da Çernomırdin belän küptän äşnälek yörtä. Tatarstanda gazlaştıru 100% citte. Ämma kiläçäktä yağulıq öçen gazlar göl genä kilep torırmı? Äytep bulmıy. Bu bik möhim säyäsi mäsälä. Mintimer Şäymievneñ üze genä uylap çığarğan ber formulası bar. Ul neft torbalar buylar här öygä, här fatirğa kilmi, dip äytergä yarata. Ä menä gaz här kuxnyağa kilä. Dimäk, bu xalıqnıñ häm däwlätneñ imin tormışına täesir itä torğan närsä. Gaz häm energetikanıñ yazmışın xäl itep, ilneñ häm xakimiätneñ yazmışın xäl itälär. Bälki şuñadır, Tatarstanda “Tattransgaz” oyışmasınıñ statusı ayırım däräcädä. Şuşı oyışmanıñ citäkçese Räfqat Kantyukov prezident belän dä, premyer belän dä, rayon-şähär başlıqları belän dä tığız xezmättäşlek itä. “Gazprom”nıñ yubilee Tatarstanda şulay uq zurlap ütkärelgän ide. Ä düşämbe könne däwlät radiosı aşa Rawil Xarisovnıñ “Tattransgaz” turındağı cırlawı tabiği yañğıradı.

Ämma bügenge iñ möhim säyäsi cır – Tatarstan möstäqillege, tuğız yıl elek tözelgän şartnamä belän bäyle. Respublikada anı sağınıp iskä aldılar. “Watanım Tatarstan” gazetasında akademik İndus Tahirov belän äñgämä ütkärgän Roza Raxmatullina möstäqillek häm şartnamäneñ bügenge xäle turında täfsille mäğlümat birergä tırışqannar. Bu xäl torğan sayın qatlawlıraq häm qäderleräk ğämällärne iskä töşerä.
XS
SM
MD
LG