Accessibility links

җомга, 9 декабрь 2016, Казан вакыты 05:09

Xalıqara Tuğan Tel köne Tatarstanda da ütä


21 fivral Xalıqara tuğan tel köne bularaq bilgeläp ütelä. Bu qararnı Berläşkän Millätlär Oyışması UNESCO täqdime belän inde 2 yıl elek qabul itkän bulğan. Bu yıldan başlap Tatarstanda da, şul köngä bağışlap, räsmi çaralar ütkäreläçäk. Mäsälän, Qazan däwlät Pedagogika universitetında «Süzleklär – tel xäzinäse» digän isem astında süzleklär tözüçe ğalimnär belän oçraşu planğa kertelgän. Şul uk 21 fivral könne, Qazannıñ 1nçe tatar gimnäziäsenä häm 13 mäktäbenä telçe galimnär çaqırılğan. Alar telebezneñ maturlığı häm kamillege turında söyläp, balalarnıñ küñelenä tuğan telne yaratu xislären señderergä tieş.

Şul uk könne «Tatarstan», «Yaña Ğasır» televidenie kanallarınıñ häm şul uk şirkät radiosınıñ irtänge efirında tuğan telne üsterügä xezmät itkän yäş häm inde tanılğan ğalimnär, cämäğät eşlekleläre çığış yasap, Tatarstanda tuğan telneñ üseşe öçen eşlängän eşlär turında söyliäçäk.

İnternet çaraları da tuğan tel könen bäyräm itüdän çittä qalmıy. 21 fivraldä İntertat.ru-elektron gazetası Qazan däwlät universitetınıñ tatar tele kafedrası mödire Fiximä Xisamova belän on-line söyläşü ütkärä. Sorawlarnı aldan qunaq@intertat.ru adresına yullarğa mömkin. Yäki 21 fivral könne, köndezge 12 dän 1gä qädär, turı elemtä waqıtında internet aşa birep bula. Tatarstan xökümäteneñ milli tellär bülege xäbär itkänçä, Mäğärif ministrlığı respublikanıñ cirle mäğärif oyışmalarına 21 fivral – xalıqara tuğan tel könen bilgeläp ütüne yıllıq planğa kertergä, digän kürsätmälär cibärgän.

Pänceşämbe könne, Däwlät Şurasınıñ parlament utırışında da tuğan telebezgä qağışılışlı ber mäsälä qaralaçaq. 20 fivraldä deputatlar Ğabdulla Tuqaynıñ tuğan können, 26 aprilne «Tuğan tel bäyräme» dip iğlan itü turındağı matdä kergän qanunnı ikençe uqılışta qabul itärgä tieş.

XS
SM
MD
LG